Н.Саид: «Худкушӣ на танҳо дар Тоҷикистон, балки дар пешрафтатарин давлатҳои дунё низ дида мешавад»

Душанбе, 11.07.2016. /АМИТ «Ховар»/. Дар 5 моҳи соли 2016 аз тарафи ноболиғон 358 ҷиноят содир гардидааст, ки нисбат ба соли гузашта   11 ҳолат ё 2,9% кам мебошад. Ҳамчунин, дар 5 моҳи соли ҷорӣ дар ҷумҳурӣ 41   нафар ноболиғон даст ба худкушӣ задаанд, ки аз инҳо 14   нафар писар ва 27   нафарашон духтарон мебошанд.
Тавре Вазири маориф ва илми Ҷумҳурии Тоҷикистон Нуриддин Саид дар нишасти матбуотӣ иттилоъ дод, худкушӣ  на танҳо дар Тоҷикистон, балки дар пешрафтатарин давлатҳои дунё низ дида мешавад. Ин як риштаи ниҳоят калони илмӣ аст ва дар атрофи ин масъала тадқиқотҳои илми бурда шудааст. Бояд гуфт, ки ин ҳодиса бештар дар қисмати шимоли Тоҷикистон   дида мешавад ва омилҳои зиёд, аз ҷумла  иқтисодӣ, иҷтимоӣ ва бахусус равонӣ дорад. Вазорати маориф ва илми Ҷумҳурии Тоҷикистон барои ҳалли ин мушкилот дар байни ҷавонон бетараф нест.
Ҳамчунин дар нишасти матбуотӣ иттилоъ доданд, ки   ғарқшавии ноболиғон   дар ин давра  50   ҳолатро ташкил дода,   аз инҳо 16   духтар ва 34   нафар писарон мебошанд, ки назар ба ҳамин давраи соли гузашта зиёд мебошад.