Рустами Эмомалӣ даъват намуд, ки мубориза бо ҷиноятҳои коррупсионӣ тақвият дода шавад

Душанбе, 18.07.16. /АМИТ «Ховар»/. Рустами Эмомалӣ, директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар ҷаласаи ҳайати мушовараи Агентӣ, ки дар Душанбе доир гардид, ба масъулон оид ба тақвият бахшидани мубориза бо ҷиноятҳои коррупсионӣ дастуру супоришҳои қатъӣ дод.
Тавре ба АМИТ «Ховар» аз маркази матбуотии Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар доданд, зимни ҷаласа фаъолияти Агентӣ, вазъияти мавҷудаи қонунвайронкуниҳо дар самти азхудкунии маблағҳои давлатӣ аз ҷониби шахсони масъул, раванди ошкорсозии маблағҳои тасарруфшуда ва таҳкими тадбирҳои оммафаҳмонӣ ҷиҳати ошкор ва пешгирии коррупсия дар мамлакат мавриди таҳлили ҳамаҷониба қарор дода шуд.
Тазаккур дода шуд, ки дар давраи ҳисоботӣ аз тарафи кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз маблағи 221,2 миллион сомонӣ зарари молиявии ошкор гардида, 125,5 млн. сомонии он барқарор карда шудааст. Дар ин давра воҳидҳои ҳифзи ҳуқуқи Агентӣ, ҷиноятҳои иқтисодӣ ва хусусияти коррупсионидоштаро бештар ошкор намуда, санҷишу тафтиши пурра ва хамаҷонибаи маводу парвандаҳои ҷиноятиро дар муҳлати муқаррарнамудаи қонун таъмин кардаанд.
Зикр гардид, ки Ҳукумати Ҷумҳурии Тоҷикистон бобати решакан кардани коррупсия ва ҷиноятҳои хусусияти коррупсионидошта тадбирҳои иловагиро амалӣ месозад, ки қабул ва татбиқи муваффақонаи «Стратегияи муқовимат бо коррупсия барои солҳои 2013-2020» аз қабили онҳост.