Суғд: 19 нафар донишҷӯ дар хориҷа таҳсил доранд

Душанбе, 21.07.2016. /АМИТ «Ховар» /.   20 июли соли равон Сӯҳроб Рустамзода, мудири шуъбаи оид ба корҳои дин, танзими анъана ва ҷашну маросимҳои миллии Мақомоти иҷроияи ҳокимияти давлатии вилояти Суғд дар нишасти хабарӣ, ки дар шаҳри  Хуҷанд доир шуд, изҳор дошт, ки барои баргардонидани 19 нафар донишҷӯёне, ки ғайрирасмӣ дар кишварҳои хориҷ таҳсил доранд, тадбирҳои иловагӣ андешида истодаанд.
Ба иттилои Сӯҳроб Рустамзода бо талоши масъулини шуъбаи вилоятӣ, бахшҳои шаҳрию ноҳиявӣ ва мақомоти дахлдор аз 649 донишҷӯе, ки дар муассисаҳои динии хориҷ таҳсили ғайрирасмӣ доштанд, 630 нафар ба Ватан баргардонида шуданд.
Бояд гуфт, ки 19 нафари боқимонда аз шаҳру навоҳии вилояти Суғд буда, барои баргардонидани онҳо ба Ватан масъулини шуъба бо падару модар ва хешовандони онҳо суҳбату мулоқотҳо доир намуда истодаанд.