Дар 25 соли истиқлолият зиёда аз 2000 километр роҳҳои мошингард бунёду навсозӣ гардида, 190 километр хатти нави роҳи оҳан сохта шуд

Душанбе, 24.08.2016. /АМИТ «Ховар»/. Имрӯз Пешвои миллат  муҳтарам Эмомалӣ Раҳмон дар маросими ба истифода супоридани роҳи оҳани Душанбе-Қурғонтеппа-Кӯлоб зимни суханронӣ, аз ҷумла зикр намуд, ки  дар тӯли солҳои истиқлолият ҷиҳати расидан ба ҳадафҳои гузошташуда дар соҳаи нақлиёти кишвар 45 лоиҳаи давлатии сармоягузорӣ ба маблағи умумии зиёда аз 12 миллиард сомонӣ татбиқ шуда, зиёда аз 2000 километр роҳҳои мошингард бунёду навсозӣ гардиданд ва 190 километр хатти нави роҳи оҳан мавриди баҳрабардорӣ қарор дода шуд.
Аммо ин ниҳояти кор нест, зеро татбиқи пурраи ҳадафи зикршуда барои кишвари мо аҳаммияти стратегӣ дошта, солҳои оянда низ ҳамчун самти муҳимму афзалиятнок идома дода мешавад.
Бо ин мақсад, ҳоло дар соҳаи нақлиёту роҳсозии кишвар татбиқи 14 лоиҳа ба маблағи умумии панҷуним миллиард сомонӣ идома дорад.