Мусобиқаи ҷумҳуриявӣ: Тарбиятгирандагони мактаб- интернати ҷумҳуриявии бачагони нобино ва сустбини шаҳри Ҳисор сазовори ҷои аввал гардиданд

Душанбе, 12.08.2016. /АМИТ «Ховар»/. Бахшида ба 25 — солагии Истиқлолияти давлатии Ҷумҳурии Тоҷикистон дар лагери «Чангоб» -и дараи Алмосии шаҳри Ҳисор аз 9 то 11 августи соли ҷорӣ Мусобиқаи ҷумҳуриявӣ байни мактаб- интернатҳои низомашон махсус баргузор гардид.
Умеда Абдуллозода, муовини раиси шаҳри Ҳисор дар маросими ҷамъбасти мусобиқа иштирок ва суханронӣ намуда, иброз дошт: «Ятимону бепарасторон, маъюбону барҷомондагон, ҳамеша дар мадди назари Сарвари давлат ва Ҳукумати кишвар қарор дошта, ҳамчун узви комилҳуқуқи ҷомеа ҳеҷ гоҳ аз ғамхориву таваҷҷуҳ бебаҳра намемонанд».
Дар ин мусобиқа зиёда аз 50 нафар тарбиятгирандагони мактаб интернатҳои низомашон махсус аз шаҳру ноҳияҳои тобеи марказ ва шаҳри Душанбе иштирок намуда, ҳунару маҳорати худро аз намудҳои шашка, шоҳмот, бадминтон ва футбол нишон доданд.
Дар натиҷа дар ҳайати давставӣ тарбиятгирандагони мактаб-  интернати ҷумҳуриявии бачагони нобино ва сустбини шаҳри Ҳисор бар ҳарифонашон ғолиб омада, сазовори ҷои аввал гардиданд.
Ҷойҳои баъдиро тарбиятгирандагони мактаб-интернатҳои шаҳри Душанбе ва ноҳияи Шаҳринав ишғол намуданд.
Дар ин бора  ба хабарнигори АМИТ «Ховар» Шералӣ Ҷалолов, корманди маркази матбуоти Кумитаи ҷавонон, варзиш ва сайёҳии назди Ҳукумати ҶТ хабар дод.