24 октябр-Рӯзи умумиҷаҳонии иттилоот барои рушд: дастрасии иттилоот- омили муҳими рушд мебошад

Душанбе, 24.10.2016 /АМИТ «Ховар»/. «Технологияҳои иттилоотӣ-робитавӣ бартараф намудани мушкилоти рушдро дар шароити ҷаҳонишавӣ таъмин карда, ба тараққиёти иқтисодӣ суръат бахшида, ба рақобати солим, дастрасии пурра ба  маълумоту донишҳо, аз байн бурдани қашшоқӣ ва расидан ба баробарии иҷтимоӣ мусоидат мекунанд», — омадааст дар  Қарори Ассамблеяи Генералии Созмони Миллали Муттаҳид бахшида ба Рӯзи умумиҷаҳонии иттилоот барои рушд, ки ҳар сол 24-уми октябр ҷашн гирифта мешавад.

Бори нахуст ин сана 43 сол қабл, соли 1973 мувофиқ ба қарори сессияи 27-уми АГ СММ (аз 19.12.1972 с.) ҷашн гирифта шудааст. Дар қарори сессияи мазкур таъкид шудааст, ки Рӯзи умумиҷаҳонии иттилоот барои рушд бояд бо Рӯзи Созмони Миллали Муттаҳид  24-уми октябр тавъам бошад ва мувофиқ ояд.

Ҳадаф аз таъсис додани Рӯзи умумиҷаҳонии иттилоот барои рушд ҷалб намудани таваҷҷуҳи афкори ҷомеа ба мушкилоти рушд маънидод шудааст. Паҳн намудани маълумот оид ба рушд омили ҷиддӣ барои дарки мушкилоти рушд дониста шуда, барои тақвияти кӯшишҳо дар соҳаи ҳамкории байналмилалӣ мусоидат мекунад.

Бояд гуфт, ки маҳз дар ҳамин сана, яъне 24-уми октябри соли 1970 Стратегияи байналмилдалии Рушд барои даҳсолаи дуюми рушд аз тарафи Созмони Миллали Муттаҳид қабул шудааст.

Одатан дар ин рӯз мушкилоти мавҷудаи рушд, таҳияи роҳҳо ва самту усулҳои бартараф намудани ин мушкилот мавриди баррасӣ қарор дода мешаванд.

Айнан чунин ҷамъомад бо ташаббуси Барномаи Рушди СММ нимаи дуюми имрӯз дар Маркази иттилоотӣ-бунёдии СММ,  воқеъ дар бинои Донишгоҳи славянии Тоҷикистону Русия баргузор мешавад.

Дар назар дошта шудааст, ки зимни ҷамъомад оид ба масъалаҳои рушд дар бахшҳои сиёсат, иқтисод ва иҷтимоиёт аз ҷониби доираи васеи коршиносону мутахассисон мубодилаи афкор сурат гирад.