Аз «ИНСАЙТ» то «БАЧАЕ АЗ ГӮРИСТОНИ МО» фосилаи чоррӯза дар миён аст

Душанбе, 24.10.2016 /АМИТ «Ховар»/. Аз  23 то 28-уми октябри соли равон дар хонаи кинои Иттифоқи синамогарони Тоҷикистон (ИСТ) (Кинотолори «Зебунисо») Рӯзҳои кинои Русия дар Тоҷикистон баргузор мегарданд. Чорабинии мазкур дирӯз, 23 октябр оғоз гардида, пас аз баргузории нишасти матбуотӣ филми «ҚУТТӢ»  ба намоиш гузошта шуд.
Инчунин дар доираи намоиш имрӯз филмҳои «ИНСАЙТ»  соати 14:00,  «ТЕЛИ  ВА ТОЛИ»  соати 16:00,  25 октябр  «NO COMMENT» соати 14:00, «ОТАШАКҲОИ ДЕҲАИ КАЛОН» 25 октябр соати 16:00, 26 октябр «ТАБИБ» соати 12:00, 27 октябр «БОЗЁФТ» соати 14:00 пешниҳод мешаванд.
Маросими пӯшидашавии рӯзҳо бо намоиши филми «БАЧАЕ АЗ ГӮРИСТОНИ МО»  28 октябр соати 14:00 дар назар аст.
25 октябр соати 12:00 дар мавзӯи «Кинемографияҳои миллӣ-дирӯз, имрӯз ва фардо» бо иштироки синамогарону мутахассисони тоҷик ва меҳмонони Рӯзҳои кинои Русия дар Тоҷикистон суҳбати «мизи мудаввар» баргузор мегардад.
Ёдовар мешавем, ки Рӯзҳои кинои Русия дар Тоҷикистон бо ташаббуси Вазорати фарҳанги Федератсияи Русия ва Иттифоқи синамогарони Тоҷикистон дар хонаи кинои «Зебунисо» баргузор мегарданд.