Барои рушди соҳибкорӣ дар соҳаи маориф тамоми заминаҳои ҳуқуқӣ ва шароити амалӣ муҳайёст

Душанбе, 19.10.2016 /АМИТ «Ховар»/. Бо ташаббуси Вазорати маориф ва илми Ҷумҳурии Тоҷикистон дар «Литсейи Раҳнамо» суҳбати таҳлилии «Рушди соҳибкорӣ дар соҳаи маориф дар замони истиқлолияти давлатии Ҷумҳурии Тоҷикистон» доир гардид. Ҷамъомад дар доираи «Ҳафтаи соҳибкорон» баргузор гашта, мақсади асосии он таҳлили дастовардҳои рушди соҳибкорӣ дар соҳаи маориф дар даврони истиқлолияти давлатӣ ва тарғиби идеяи дастгирии соҳаи маориф аз тарафи доираҳои иқтисодӣ ва соҳибкории ватанӣ мебошад.
Дар суҳбат намояндагони Шўрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ, Вазорати маориф ва илми Ҷумҳурии Тоҷикистон, соҳибкорони ҳамкор бо соҳаи маориф, мутахассисони соҳа, муассисон ва роҳбарони муассисаҳои таълимии томактабӣ ва миёнаи хусусӣ масъалаҳои ин соҳаро ба таври васеъ баррасӣ намуданд.
Вазири маориф ва илми Ҷумҳурии Тоҷикистон Саид Нуриддин Саид дастовардҳои кишварро дар ин самт таҳлил намуда, аз ҷумла изҳор намуд, ки «таваҷҷуҳи соҳибкорони ватанӣ ба таъсири боғчаю мактаб ва дармонгоҳу бемористонҳо нишондиҳандаи фарорасии марҳилаи нави соҳибкории ватанӣ, яъне марҳилаи гуманизатсияи моликияти хусусӣ мебошад. Бо дастгирӣ ва супоришҳои бевоситаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрўз барои ҳамкории давлат ва бахши хусусӣ тамоми заминаҳои меъёрӣ ва ҳуқуқӣ муҳайё шуда, рушди соҳаи маориф ҳамеша дар маркази таваҷҷуҳи Пешвои миллат қарор дорад».
Роҳбари котиботи Шўрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ Нўъмонҷон Абдуғаффорзода хусусиятҳо ва дурнамои сиёсати давлатии Ҷумҳурии Тоҷикистон дар бахши дастгирии соҳибкорӣ дар соҳаи маорифро барои соҳибкорон шарҳ дода, чунин гуфт: «Бо ташаббуси Пешвои миллат дар солҳои охир барои дастгирии соҳибкорӣ дар соҳаи маориф як қатор имтиёзҳо ҷорӣ шудаанд, ки тарзи имтиёзноки додани қитъаҳои замин барои сохтани боғчаю мактабҳо, имтиёзҳои ҷиддии андозӣ барои соҳибкорӣ дар ин соҳа, аз ҳисоби давлат муҷаҳҳаз шудани мактабҳое, ки соҳибкорон сохтаанд ва ғайра намунаҳои мушаххаси он мебошанд».
Сардори Раёсати иқтисод ва банақшагирӣ дар соҳаи маориф ва илми Вазорати маориф ва илми ҶТ И. Донахонов рушди муассисаҳои томактабӣ ва миёнаи таълимии хусусиро дар замони истиқлолияти давлатии Тоҷикистон таҳлил намуда, зикр кард, ки нақши бахши хусусӣ дар рушди ин соҳа рўз аз рўз афзоиш меёбад.
Зимни суҳбат таҷрибаи рушди муассисаҳои томактабӣ дар Тоҷикистон дар мисоли боғчаи бачагонаи «Ахтарон» ва рушди муассисаҳои миёнаи таълимӣ дар даврони истиқлолият дар мисоли «Литсейи Раҳнамо» муаррифӣ шуданд.
Инчунин дар саҳни мактаб намоишгоҳҳои идонаи «Домани пурбор дорад тирамоҳ», «Дастовардҳои литсей», «Намунаи либосҳои мактабӣ», «Ҳунарҳои дастии хонандагон» ба тамошо гузошта шуданд.
Ҳозирон ҳамчунин ба таҷрибаи татбиқи низоми байналхалқии баҳогузории садхола дар литсей, ки аз тарафи Вазорати маориф ва илми ҶТ ба таври таҷрибавӣ ҷорӣ шудааст, аз наздик шинос шуда, ба он баҳои баланд доданд.
Вазири маориф ва илми Ҷумҳурии Тоҷикистон изҳор дошт, ки дар доираи супоришҳои Пешвои миллат ҷашни бостонии Меҳргон дар тамоми идораю муассисаҳои зертобеи вазорат бо мазмуни баланди ватандўстӣ, фарҳангӣ ва тарбиявӣ ҷашн гирифта мешавад.
Дар ҷамъомад ба соҳибкорони саҳмгузор дар рушди соҳа ва муассисаҳои таълимии хусусии пешқадам ифтихорнома ва сипосномаҳои Вазорати маориф ва илми Ҷумҳурии Тоҷикистон супорида шуд.