Ба муносибати Рӯзи Президент: намоиши китобҳои Пешвои миллат дар Академияи илмҳои ҶТ

Душанбе, 15.11.2016. /АМИТ «Ховар»/. Намоиши китобҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бахшида ба Рўзи Президент имрӯз, 15 ноябр дар Китобхонаи марказии илмии ба номи Индира Гандии Академияи илмҳои Ҷумҳурии Тоҷикистон баргузор шуд.
«Мақсад аз намоиш- нишон додани саҳму нақши Сарвари давлат дар рушду равнақи босуботи кишвари соҳибистиқлоли Тоҷикистон ва баланд бардоштани мафкураи миллии мардуми мо мебошад. Ин намоиши китоб дар муаррифии саҳми Президенти мамлакат дар татбиқи сиёсати сулҳу баҳамоӣ ва Ваҳдати миллӣ дар Ҷумҳурии Тоҷикистон ҳамто надорад»,-хабар доданд аз китобхона.
Тавре ки котиби матбуотии Академияи илмҳои Ҷумҳурии Тоҷикистон Шервони Умриддин иттилоъ дод, дар намоиш муовини директори Китобхонаи марказии илмии ба номи Индира Гандии Академияи илмҳои Ҷумҳурии Тоҷикистон Баҳром Олимов оид ба китоби Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Забони миллат-ҳастии миллат» сухан ронда, гуфт: «Пешвои миллат тасмим гирифтаанд, то таърихи забони тоҷикиро дар силсилае бо унвони «Забони миллат-ҳастии миллат» ба нашр расонанд ва ин китоби аввал аст. Аз нигоҳи сохторӣ китоби мазкур дар баробари муқаддимаву хулоса ва китобнома фарогири 6 боб буда, ҳар боб аз се то панҷ фаслро дар бар мегирад».
Идомаи чорабинӣ дар мавзӯи «Президент ва Истиқлолияти миллӣ» бахшида ба «Рӯзи Президент» 16 ноябри соли 2016, соати 09:00 дар Китобхонаи миллии Тоҷикистон бо маърӯзаҳои илмии олимон, академикон, шоирон ва нависандагони ҷумҳурӣ баргузор хоҳад гашт.