Ба ҷавонони ВМКБ фаъолияти соҳибкорӣ омӯзонида шуд

ХОРУҒ,  26.12.2016. /АМИТ Ховар/.    25 декабри соли равон дар шаҳри Хоруғ бо ташаббуси Кумитаи ҷавонон, варзиш ва  сайёҳӣ дар мавзӯи «Омӯзиши паҳлӯҳои соҳибкорӣ ва тарзи нақшаи соҳибкорӣ» машварат баргузор гардид.

Машварати мазкур бо мақсади ҷалби ҷавонон ба соҳибкорӣ, омӯзиши паҳлӯҳо ва мушкилоту дастовардҳои фаъолияти соҳибкорӣ баргузор гардид. Дар он зиёда аз 40 нафар ҷавон аз шаҳру ноҳияҳои Хоруғ, Шуғнон ва Роштқаъла иштирок намуданд.

Дар машварат ба иштирокчиён тартиби таҳия намудани нақшаи соҳибкорӣ, кор бо шарикон ва маркетинг омӯзонида шуд.

Дар семинар ба иштирокчиён дастгириҳои давлату ҳукумати кишвар нисбат ба фаъолияти соҳибкорӣ фаҳмонида шуд.