Дар Агентии назорати маводи нашъаовар зиёда аз 360 кг маводи нашъаовар сӯзонида шуд

ДУШАНБЕ, 21.12.2016 /АМИТ «Ховар»/. Имрӯз дар Агентии назорати маводи нашъаовари назди Президенти Ҷумҳурии Тоҷикистон зиёда аз 360 кг маводи нашъаовар сӯзонида шуд. Дар ин бора хабарнигори АМИТ «Ховар» иттилоъ дод.
«Маводи нашъаовар аз 7 кг 984 гр героин, 110 кг 910 гр афюн, 111 кг 425 гр ҳашиш, 136 кг 700 гр бангдона ва 1 кг 250 гр ҳаби МДМА иборат буд. Он дар ҳузури комиссияи махсус аз ҳисоби намояндагони мақомоти прокуратура, суд, сохторҳои ҳифзи ҳуқуқ ва воситаҳои ахбори омма нобуд карда шуд»,-хабар дод манбаъ.
Ба иттилои Агентӣ, маводи нашъаовар аз тарафи кормандони Агентии назорати маводи нашъаовари назди Президенти Ҷумҳурии Тоҷикистон, Кумитаи давлатии амнияти миллӣ ва Хадамоти гумруки назди Ҳукумати Ҷумҳурии Тоҷикистон ҳангоми гузаронидани амалиёти фаврию ҷустуҷӯӣ мусодира гардида буд.
Бояд зикр намуд, ки дар давоми ҳабдаҳ соли охир дар бухории Агентӣ зиёда аз 17,5 тонна маводи нашъаовар сӯзонида шудааст.