Дар Ҷумҳурии Тоҷикистон Маркази миллии антидопингӣ таъсис дода мешавад

ДУШАНБЕ, 20.12.2016 /АМИТ «Ховар»/. Дар Ҷумҳурии Тоҷикистон Маркази миллии антидопингӣ таъсис дода мешавад. Ин матлаб зимни мулоқоти муовини раиси Кумитаи ҷавонон, варзиш ва сайёҳии назди Ҳукумати ҶТ Дилшод Назаров бо директори Маркази минтақавии антидопингӣ Майра Бакашева матраҳ гардид.
Тавре ба хабарнигори АМИТ «Ховар» аз Кумитаи ҷавонон, варзиш ва сайёҳии назди Ҳукумати ҶТ хабар доданд, дар ҷараёни мулоқот Дилшод Назаров иброз намуд, ки Ҳукумати Ҷумҳурии Тоҷикистон барои рушди соҳаи варзиш таваҷҷуҳи зиёд зоҳир менамояд.
«Майра Бакашева, директори Маркази минтақавии антидопингӣ ба Ҳукумати Ҷумҳурии Тоҷикистон ва сохторҳои масъуле, ки бевосита дар соҳаи варзиш фаъолият менамоянд, барои дастовардҳои назаррасашон дар соли 2016 изҳори сипос намуд»,-хабар дод манбаъ.
Бояд зикр намуд, ки Ҷумҳурии Тоҷикистон соли 2012 ба Конвенсияи байналмилалии зиддидопингӣ имзо гузоштааст. Дар доираи он муваззаф аст, ки талаботи онро риоя намуда, фаъолияташро мутобиқ ба он ба роҳ монад.