Медалҳои биринҷӣ ба «Регар-ТадАЗ» тақдим шуданд

ДУШАНБЕ, 16.12.2016 /АМИТ «Ховар»/. Дирӯз дар маросими тантанавӣ медалҳои биринҷии Чемпионати мамлакат оид ба футбол байни дастаҳои Лигаи олӣ ба футболбозони дастаи «Регар-ТадАЗ»-и шаҳри Турсунзода супорида шуданд. Дар ин бора сомонаи ФФТ хабар дод.
Расми супоридани медалҳо дар меҳмонхонаи «Ширкент» сурат гирифт.
«Медалҳои биринҷиро ба футболбозони ҳайати асосӣ ва ҳайати дуюми дастаи «Регар ТадАЗ» ноиби президенти ФФТ Дилшод Ҷӯраев ва директори генералии Лигаи миллии футболи Тоҷикистон Алишер Урунов супориданд. Дар ҷараёни медалсупорӣ ноиби президети ФФТ ба ширкати «ТАЛКО» барои дастгирии дастаи «Регар-ТадАЗ» изҳори минатдорӣ кард»,- хабар медиҳад манбаъ.
Дастаи «Регар- ТадАЗ» дар мавсими соли 2016 аз 18 вохӯрӣ дар 10 бозӣ ғалаба карда, 2 бозиро мусовӣ ва 6 вохӯриро бо бохт ҷамъбаст намуд ва бо касби 32 имтиёз соҳиби ҷои сеюм гардид.
Ҳамлагари даста Ромиш Ҷалилов бо 10 тӯби задааш дар зинаи сеюми беҳтарин нишонзанҳои Чемпионат қарор гирифт.