Дар Вашингтон имкониятҳои сармоягузории ширкатҳои Амрико ба Тоҷикистонро баррасӣ намуданд

ДУШАНБЕ, 03.04.2017 /АМИТ «Ховар»/. 31 марти соли 2017 Сафорати Тоҷикистон дар ШМА дар ҳамоҳангӣ бо Шӯрои тиҷоратии ШМА-Тоҷикистон ҳамоиши тиҷоратӣ-сармоягузорӣ бо мақсади ҷалби сармоя ва ширкатҳои ШМА ба Тоҷикистон доир намуд.
Дар ҳамоиш намояндаҳои ширкатҳои бузурги амрикоӣ, мисоли «General Electric Company», «Baker & McKenzie», «AGCO Corporation», инчунин намояндаҳои сохторҳои давлатӣ, ба монанди Котиботи давлатӣ, Вазорати тиҷорат ширкат варзиданд.
Зимни суханронӣ Сафири Тоҷикистон дар ШМА Фарҳод Салим оид ба имкониятҳои сармоягузорӣ ва тиҷорат дар кишвар маълумот дод. Ҳамзамон дастовардҳои Тоҷикистон дар таҳкими се ҳадафи стратегии кишвар, аз ҷумла таъмини амнияти энергетикӣ, баромадан аз бунбасти коммуникатсионӣ ва таъмини амнияти озуқаворӣ ба ширкатҳои америкоӣ муаррифӣ карда шуда, онҳо барои ҳамкорӣ дар ин самтҳои муҳим даъват карда шуданд. Маълумот дода шуд, ки бо ташаббуси Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кишвар Шӯрои машваратӣ оид ба беҳтар намудани фазои сармоягузорӣ таъсис дода шуда, фаъолият менамояд.