19 май -Рӯзи байналмилалии мубориза бо гепатит: беморие, ки пурра муолиҷа мешавад

Май 19, 2017 17:00

ДУШАНБЕ, 19.05.2017. /АМИТ «Ховар»/.    Рӯзи байналмилалии мубориза бо гепатит (қубод, зотулкабид) аз соли 2008 бо ташаббуси Иттиҳоди байналмилалии мубориза бо гепатит 19 май таҷлил карда мешавад. Ин рӯз беш аз 200 ассотсиатсияи беморонро дар беш аз 50 давлати ҷаҳон бо ҳам муттаҳид мекунад. Гепатит яке аз бемориҳои хавфнок буда, ба ҷигари инсон зарар мерасонад. Беморӣ оҳиста-оҳиста  оғоз ёфта, бе ягон аломат мегузарад,  бинобар ҳамин онро «қотили меҳрубон» меноманд.

Бино ба маълумоти оморӣ, ҳар як 12-ум нафар дар ҷаҳон вируси гепатити В  ё С дорад.

 

 

Мирочов _3__1Духтури гастроэнтеролог, академик Ғиёсиддин Меҳроҷов иброз дошт, ки мушкилоти ташхис ва ошкор намудани ин беморӣ то ҳол дар ҷумҳурӣ вуҷуд дорад. «Имрӯз дар Душанбе ташхисгоҳҳои давлативу ғайридавлатӣ хеле зиёд гаштаанд, вале на ҳамаи онҳо ташхиси дуруст мегузаронанд. Агар бемор бо вируси гепатит дар  се ташхисгоҳ хун супорад, ба ӯ се навъ ҷавоб пешниҳод мекунанд. Ин, албатта, ҳам кори духтурон ва ҳам беморонро душвор месозад, зеро ҳар як  ташхиси  бемории  гепатит иборат аз чанд таҳлил,  500 сомонӣ нарх дорад. Ин барои беморон хеле гарон меафтад. Аз ҳамин сабаб мо чанд рӯз пеш бо намояндагони ташхисгоҳҳои пойтахт як машварати махсус гузаронида, ин масъаларо дар доираи он баррасӣ намудем. Тариқи чунин машваратҳо мо мехоҳем ин мушкилотро дар пойтахт бартараф намоем»,-илова намуд Ғ. Меҳроҷов.

Бино ба гуфтаи академик, дар ҷаҳон 9 навъи вируси гепатит ошкор гардидааст, аз ҷумла А, В, С, Д, Е, J, T  ва ғайра. «Аз ҳамин 9 навъи  вирус, танҳо вируси А ба ҷигар кам таъсир мерасонад.  Дигар вирусҳо таъсири бад расонида, ҳатто метавонанд ба сиррози ҷигар ва ё раки ҷигар оварда расонанд. Аз ҳамин сабаб пешгирӣ ва табобати ин беморӣ мушкилоти мубрами илми тиб ва мутахассисон мебошад»,- зикр намуд табиб.

Ба андешаи Ғиёсиддин Меҳроҷов, қабули «Қонун дар бораи муоинаи тиббии ҳатмии навхонадорон пеш аз издивоҷ» саривақтӣ мебошад, зеро ҷавонон пеш аз никоҳ бемории худро муайян ва муолиҷа мекунанд. «Ин имкон медиҳад, ки натанҳо ин ҷуфти оиладоршаванда аз бемориҳои вирусӣ эмин мемонанд, балки фарзандони солим ба дунё меоранд. Бисёриҳо гумон мекунанд, ки танҳо дандонпизишкон сирояткунандаи вируси гепатит ҳастанд, аммо ин андеша нодуруст аст.  Имрӯз духтурони занона, кормандони маркази хун, ҷарроҳон, шахсоне, ки дар кошонаҳои ҳусн кор мекунанд,  метавонанд паҳнкунанди ин вирсус бошанд. Ҳатто оро додани нохун дар кошонаи ҳусн метавонад ба бемории гепатити мубтало намояд.  Имрӯз қариб дар тамоми марказҳои дандонпизишкӣ вируси гепатити В ва ё С  бо усули тестӣ муайян карда мешавад, Ҳар як шахс бояд назди духтури дандон бо асбобҳои яккаратина ва ё худ ояд»,-зикр намуд академик Мироҷов.

Ба андешаи табиб, имрӯз бемории гепатит пурра муолиҷа мешавад.  «Ҳоло доруҳои нав кашф шудаанд, ки дар муддати 3-5 моҳ метавонанд бемории вируси гепатити В ва С-ро пурра табобат намоянд. Ин амал инчунин нисбат ба солҳои пешин камхарҷтар шудааст. Агар пештар беморон барои дору то 10 ҳазор доллари амрикоӣ сарф мекарданд, имрӯз онро ба маблағи 500-600 доллар метавонанд харидорӣ кунанд. Танҳо муолиҷаи вируси гепатити  Д каме мушкилтар аст, вале он ҳам пурра муолиҷашаванда мебошад»,-афзуд мусоҳиб.

Тавре ки аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон  хабар доданд, барои пешгирии паҳншавии вируси гепатит ба ҳамаи мутахассисони соҳаи тиб супориш дода шудааст, ки ҳангоми кор бо беморон чораҳои профилактикиву санитариро риоя кунанд. Аз ҷумла, бо мақсади бемор нашудани худи табиб ва дигар беморон бояд, ки ҳар як табиб  дастпӯшаки махсус, даҳанпӯш ва асбобҳои якдафъаинаро истифода намояд.

 

 

Май 19, 2017 17:00

Хабарҳои дигари ин бахш

10 АМАЛИ ЗАМИНАСОЗИ СУЛҲУ ВАҲДАТ. Ба истиқболи 28-солагии Рӯзи Ваҳдати миллӣ
Маҳз Ваҳдати миллӣ — рукни асосӣ ва муҳим давлати тозаистиқлоли тоҷиконро таҳким бахшид
Ваҳдати миллӣ арзишмандтарин бозёфт дар таърихи навини давлатдории миллати тоҷик мебошад
АРТИШИ МИЛЛӢ НА ТАНҲО ҚУДРАТИ ҲАРБӢ, БАЛКИ РАМЗИ ВАҲДАТ АСТ. Андешаҳои Вазири мудофиаи Ҷумҳурии Тоҷикистон дар ин мавзуъ
Барно Саидвализода: «Ваҳдати миллӣ – ин неъмати бузургу кафолати зиндагии шоистаро пойдор нигоҳ бидорем»
Дилбар Одилзода: «Ваҳдати миллӣ ва рушди зан дар Тоҷикистон ду раванди бо ҳам пайвастанд»
Муовини якуми Раиси ҲХДТ: «Аз ваҳдати миллӣ садҳо ғояҳои бунёдкорӣ ба вуҷуд омада, Тоҷикистон ба гулистон табдил ёфт»
Дарк кардани қадру қимати сулҳу ваҳдат ва ҳифзу таҳкими он вазифаи муҳимтарини ҷомеа мебошад
Ваҳдати миллӣ ва рушди парламентаризм дар Тоҷикистон яке аз дастовардҳои муҳими даврони соҳибистиқлолӣ ба шумор меравад
Абдулло Раҳмонзода: «Ваҳдати миллӣ дар давраҳои гуногуни таърихӣ омили наҷотбахш ва сарчашмаи эҳёи дубораи халқи тамаддунофари тоҷик гардидааст»
КИШТИ ТАКРОРӢ. Барои рӯёнидани ду ё се ҳосил аз як замин чӣ бояд кард?
ТАВСИЯИ МУТАХАССИС. Истеъмоли мармиҷон мӯй ва нохунҳоро мустаҳкам карда, онҳоро қавӣ ва дурахшонтар месозад