Дар Тоҷикистон дар рекламаҳо истифодаи истилоҳҳои «беҳтарин», «рақами 1», «сифати олӣ», «бо нархи арзон» манъ карда мешаванд

ДУШАНБЕ, 13.07.2017 /АМИТ «Ховар»/. Тибқи ворид намудани тағйиру иловаҳо ба Қонуни Ҷумҳурии Тоҷикистон «Дар бораи реклама», ки  онро аъзои Маҷлиси миллӣ дар иҷлосияи ёздаҳуми палатаи  болоии Парлумон  ҷонибдорӣ намуданд, минбаъд дар адабиёти таълимӣ, лавозимоти дарсӣ- китоб, дафтар, рӯзнома пахши реклама манъ аст.

Ҳадафи ворид намудани  тағйиру иловаҳо ба қонуни  мазкур танзими бозори реклама дар Ҷумҳурии Тоҷикистон арзёбӣ мегардад. Инчунин тибқи ин тағйирот минбаъд барои рекламаи мол ва хизматрасонӣ дар Тоҷикистон истифодаи истилоҳҳои  «беҳтарин», «рақами 1», «сифати олӣ», «бо нархи арзон» манъ карда мешаванд, зеро истифодаи ин калимаҳо боиси вайронкунии қонунгузории реклама буда, дар бозори молии муайян рақобати носолимро эҷод менамояд.

Ҳамзамон  барои ба танзим даровардани пахши реклама дар  радио ва телевизионҳои ҷумҳурӣ,  новобаста аз шакли моликияташон,  аз ин ба баъд  давомнокии пахши як реклама дар байни барномаҳои радио ва телевизион набояд аз се дақиқа зиёд бошад, зеро тӯл кашидани реклама бинанда ва шунавандаи барномаҳоро нороҳат месозад.