ТАҚВИМИ АМИТ «ХОВАР»: Имрӯз 28 август, душанбе, 240-умин рӯзи соли 2017 аст. То охири сол 125 рӯзи дигар боқӣ мондааст

Тақвими моро ҳар рӯз дар ин гӯша 

шореҳ Шукӯҳи ДАЛЕР варақ мезанад:

28 августи соли 1992 миёни Тоҷикистон ва Ҳиндустон муносибати дипломатӣ барқарор гардидааст.

***

9 сол қабл, 28 августи соли 2008 дар шаҳри Душанбе ҷаласаи навбатии Шӯрои сарони давлатҳои аъзои Созмони ҳамкории Шанхай баргузор гардида буд. Баъди анҷоми ҷаласаи васеи он дар толори «Амфитеатр»-и Кохи Сомон бо иштироки сарони давлатҳои аъзои Созмони ҳамкории Шанхай 8 санади нави ҳамкорӣ ба имзо расида буд, ки яке аз онҳо Созишнома дар бораи тартиби ташкил ва гузаронидани машқҳои муштараки зиддитеррористии давлатҳои аъзои Созмони ҳамкории Шанхай маҳсуб меёбад.

***

28 августи соли 2008 миёни Вазорати энергетика ва саноати Ҷумҳурии Тоҷикистон ва ширкати хитойии «Yunnan Phosphate Chemical Group Co., LTD» Ёддошти тафоҳум оид ба ҳамдигарфаҳмӣ   ба имзо расида буд.

***

Панҷ сол пеш, 28 августи соли 2012 дар маҷлиси Ҳукумати Ҷумҳурии Тоҷикистон, ки таҳти раёсати Президенти Ҷумҳурии Тоҷикистон, Раиси Ҳукумати мамлакат муҳтарам Эмомалӣ Раҳмон баргузор гардида буд, яке аз қуллаҳои баланди бе номи қаторкӯҳи Помир, ки аз ҷониби 75 нафар кӯҳнавард аз 17 кишвари ҷаҳон фатҳ гардидааст, «20-солагии Иҷлосияи 16-уми Шӯрои Олии Ҷумҳурии Тоҷикистон» номгузорӣ шуд.

***

28 августи соли 2012 дар шаҳри Душанбе Президенти  Ҷумҳурии Тоҷикистон муҳтарам Эмомалӣ Раҳмон гурӯҳи вакилони Парлумони Созмони амният ва ҳамкорӣ дар Аврупо (САҲА)-ро бо роҳбарии Ахтар Чаудри ба ҳузур пазируфта буданд. Дар мулоқот масоили ҳамкории Тоҷикистон бо ин созмони бонуфузи ҷаҳонӣ ва кишвари Норвегия баррасӣ гардиданд.

***

Дар ин рӯзи соли 2015 Пешвои миллат муҳтарам Эмомалӣ Раҳмон ба истиқболи 24-умин  солгарди Истиқлолияти давлатии Ҷумҳурии Тоҷикистон гурӯҳи калони кормандони касбу кори гуногунро, ки дар фаъолияти худ ба дастовардҳои намоён ноил гардидаанд, бо мукофотҳои давлатӣ, рутбаҳои баланди низомию махсус ва ҷоизаҳои давлатӣ сарфароз гардонда буданд.

28 АВГУСТ ТАҶЛИЛ КАРДА МЕШАВАД:

Дар Гонконг  —  Рӯзи озодкунӣ.

***

Дар Хитой – Рӯзи Тси Си — иди ошиқон.

РӮЙДОДҲО:

 28 августи соли 2000 Президенти Ҷумҳурии Тоҷикистон муҳтарам Эмомалӣ Раҳмон ва Пешвои  исмоилиҳои ҷаҳон шоҳзода Оғо Хони IV барои дар шаҳри Хоруғ бунёд намудани Донишгоҳи байналмилалии Осиёи Марказӣ созишнома ба имзо расониданд.

***

28 августи соли 2009 Суди олии Ҷумҳурии Тоҷикистон 4 шаҳрванди Тоҷикистонро барои шомил шудан ба гурӯҳи террористии  «Ал-Қоида» ба ҷазо маҳкум кард.

***

28 августи соли 2009 минтақаҳои озоди иқтисодии «Ишкошим» ва «Данғара» таъсис дода шуданд.

***

81 сол муқаддам, 28 августи соли 1936 ширкати автомобилии «Тойота» таъсис дода шудааст.

***

Дар ин рӯзи соли 1973 дар Иёлоти Оахасаи Мексика дар натиҷаи заминҷунбии иқтидораш 6.8-балла зиёда аз 520 нафар ба ҳалокат расидаанд.

***

28 августи соли 1991 Президенти Қазоқистон Нурсултон Назарбоев оид ба хатми истифодаи машқгоҳи Семипалатинск фармон баровард.

ИНЧУНИН ДАР ИН РӮЗ…

Соли  2003  аввалин ҳавопаймои мусофирбар аз Кобул ба Душанбе парвоз анҷом дода буд.

***

Соли 1933 полиси Англия аввалин маротиба радиоро барои дастгир кардани ҷинояткор истифода бурдааст.