5-умин Бозиҳои Осиё: Сиёвуш Забиров дар даври аввал ғалаба кард

ДУШАНБЕ, 18.09.2017. /АМИТ «Ховар»/. Дар рӯзи дуюми 5-умин Бозиҳои Осиё дар иншооти пӯшида ва ҳунарҳои размӣ, ки дар шаҳри Ашқободи Ҷумҳурии Туркманистон ҷараён доранд, мусобиқа оид ба муай тай (бокси тайӣ) идома ёфт.

Бино ба иттилои Хадамоти матбуоти Кумитаи миллии олимпии Ҷумҳурии Тоҷикистон, дар ин намуд варзишгарон дар вазнҳои -60 ва -81 кг рақобат карданд. Варзишгари тоҷик Сиёвуш Забиров дар вазни -81 кг ба майдон баромада, ҳарифаш Муҳаммад Салама аз Урдунро бо ҳисоби 29:27 мағлуб кард. Ҳарифи Сиёвуш дар даври чорякфинал Ҳошим Маҷиди эронӣ мебошад. Ин ҳарб 19 сентябр доир мегардад.

Тавре иттилоъ дода шуд, мусобиқа оид ба муай тай имрӯз, 18 сентябри соли равон идома меёбад. Варзишгарони тоҷик Манучеҳри Назривалӣ дар вазни -54 кг бо Елазан Замирбеков аз Қирғизистон ва Саъдӣ Шарипов дар вазни -57 кг бо Чотичанин Кокрашай аз Тайланд рақобат мекунанд.