Дар Хуҷанд муҳоҷирони меҳнатии бозгашта ба касбомӯзӣ фаро гирифта шуданд

ДУШАНБЕ, 05.09.2017 /АМИТ «Ховар»/. Дар доираи лоиҳаи «Интегратсияи иҷтимоии муҳоҷирони меҳнатии бозгашта тавассути касбомӯзӣ, бозомӯзӣ ва бо кор таъминкунӣ»-и ташкилоти ҷамъиятии «Насли нав» дар шаҳру ноҳияҳои  Хуҷанд курсҳои кӯтоҳмуддати ройгон барои муҳоҷирони меҳнатӣ ва аъзои оилаи онҳо гузаронида шуданд.

Тавре ба мухбири АМИТ «Ховар» аз Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон хабар доданд,  ин ташкилот дар якҷоягӣ бо Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд ҳамкории зиҷ  дошта,  самти асосии лоиҳа ба касбомӯзӣ фаро гирифтани муҳоҷирони меҳнатии берункардашуда  мебошад.

Инчунин зикр гардид, ки дар ин муддат 15 семинари омӯзишӣ бо фарогирии 315 нафар, 4 вохӯрии иттилоотӣ бо фарогирии 520 нафар ва 3 чорабинии фарҳангӣ бо фарогирии 230 нафар муҳоҷирони меҳнатӣ ва аъзои оилаи онҳо дар шаҳру ноҳияҳо мақсаднок гузаронида шуданд.