“ПАРВОЗИ ОРЗУ”. Дар ноҳияи Бобоҷон Ғафуров таҳти ин ном кӯдакистони хусусӣ ба истифода дода шуд

ХУҶАНД, 07.09.2017 /АМИТ «Ховар»/.  6 сентябри соли равон дар Ҷамоати деҳоти Ҳайдар Усмони ноҳияи Бобоҷон Ғафуров кӯдакистони хусусӣ бо номи «Парвози орзу» ба истифода дода шуд.

Тавре масъулини маорифи ноҳияи Бобоҷон Ғафуров  иттилоъ доданд, муассисаи мазкур аз ҷониби соҳибкори маҳаллӣ Сӯҳроб Маҳмудов бунёд ёфта, дорои тамоми шароити муосир мебошад.

Муассисаи томактабӣ барои 150 нафар кӯдак пешбинӣ гардида, ҳамзамон беш аз 20 нафар  дар он бо ҷойи кори доимӣ  таъмин гардиданд.

Раиси вилоят ифтитоҳи ин кӯдакистонро туҳфаи арзанда ба пешвози ҷашни Истиқлолияти давлатӣ арзёбӣ намуда, баён дошт, ки имрӯзҳо дар саросари Тоҷикистон  корҳои бунёдкорӣ бомаром идома доранд ва саҳми соҳибкорон дар  ин раванд хеле назаррас аст.