«Сомон Эйр» ба Ассотсиатсияи байналмилалии нақлиёти ҳавоӣ шомил гардид

ДУШАНБЕ, 07.09.2017 /АМИТ «Ховар»/.   «Сомон Эйр» дар Тоҷикистон аввалин ва дар минтақаи Осиёи Марказӣ сеюмин ширкати ҳавопаймоист, ки сертификати узвияти IATA — Ассотсиатсияи байналмилалии нақлиёти ҳавоиро соҳиб гардид.  Дар ин бора ба мухбири АМИТ «Ховар» аз маркази матбуоти Ширкати ҳавопаймоии «Сомон Эйр» хабар доданд.

Директори генералии ширкати ҳавопаймоии «Сомон Эйр»   Томас В. Ҳаллам II  дар робита ба ин рӯйдоди муҳим изҳор дошт: «Узвият дар ин ассотсиатсияи бонуфузи байналмилалӣ, бешак ба тақвияти мавқеи ширкати ҳавопаймоии мо ҳамчун интиқолдиҳандаи минтақавӣ ва байналмилалӣ мусоидат намуда, барои истифодаи таҷрибаи интиқолдиҳандагони ҳавоии пешбар, ҷорӣ намудани технологияҳои нав ва намудҳои нави хизматрасонӣ, ҳамзамон баланд бардоштани стандартҳои фаъолияти фаврӣ ва осон кардани тартиби бастани созишномаҳо имконият фароҳам меорад ва дар ниҳоят афзалиятҳои ҷиддии рақобат ва кам кардани хароҷотро пешбинӣ менамояд».

Зикр карда шуд, ки яке аз бартариятҳои асосии узвияти ширкати «Сомон Эйр» дар IATA — имкони бастани қарордодҳои интерлайн ва код-шеринг бо интиқолдиҳандагони ҳавоии пешбари байналмилалӣ хоҳад буд. Ин ба ширкат имкон медиҳад, ки  мусофирон ва бағоҷро ба тамоми самтҳои зарурии берун аз доираи хатсайрҳои «Сомон Эйр» интиқол диҳанд.

Бояд зикр намуд, ки Ассотсиатсияи байналмилалии нақлиёти ҳавоӣ IATA — ассотсиатсияи ихтисосии ширкатҳои ҳавопаймоии иҷрокунандаи хатсайрҳои байналмилалӣ буда, вазифаи ҳамоҳангсозӣ ва намояндагии манфиатҳои соҳаи нақлиёти ҳавоиро дар бахшҳои таъмини бехатарии парвозҳо, иҷрои парвозҳо, хизматрасонии техникӣ, бехатарии авиатсионӣ ва тарҳрезии стандартҳои байналмилалӣ анҷом медиҳад. Айни замон 275 ширкати ҳавопаймоӣ аз 119 давлати ҷаҳон аъзои IATA мебошанд.