Баррасии лоиҳаи Қонун «Дар бораи мақоми пойтахти Ҷумҳурии Тоҷикистон» аз сӯи аъзои Шӯрои Парлумон

ДУШАНБЕ,16.10.2017/АМИТ «Ховар»/. Лоиҳаи Қонуни Ҷумҳурии Тоҷикистон «Дар бораи мақоми пойтахти Ҷумҳурии Тоҷикистон» дар ҷаласаи Шӯрои  палатаи поёнии Парлумони Тоҷикистон, ки имрӯз таҳти раёсати Раиси Маҷлиси намояндагон Шукурҷон Зуҳуров доир гардид, баррасӣ шуд.

Абдураҳим Холиқзода, раиси кумитаи Маҷлиси намояндагон оид ба сохтори давлатӣ ва худидоракунии маҳаллӣ  зикр намуд, ки лоиҳаи Қонуни Ҷумҳурии Тоҷикистон «Дар бораи мақоми  пойтахти Ҷумҳурии Тоҷикистон» бо тартиби ҳуқуқи ташаббуси қонунгузорӣ аз тарафи Ҳукумати Ҷумҳурии Тоҷикистон ҷиҳати иҷрои дастуру супоришҳои Президенти Ҷумҳурии Тоҷикистон Эмомалӣ Раҳмон, ки дар вохӯрӣ бо масъулону фаъолони шаҳри Душанбе моҳи феврали соли равон баён дошта буданд, таҳия гардидааст.

Зикр шуд, ки лоиҳаи қонуни мазкур мақоми пойтахти Ҷумҳурии Тоҷикистон, хусусиятҳои идоракунӣ ва асосҳои ташкилӣ, ҳуқуқӣ, иқтисодӣ ва иҷтимоии фаъолияти онро муқаррар менамояд.

Аъзои Шӯро ҳамзамон лоиҳаи қонунҳои Ҷумҳурии Тоҷикистон  «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи бақайдгирии давлатии молу мулки ғайриманқул ва ҳуқуқҳо ба он»,  «Дар бораи ҳифзи навъҳои растанӣ», «Дар бораи ҳуқуқи муаллиф ва ҳуқуқҳои вобаста ба он», инчунин ворид намудани тағйирот ба Кодекси мурофиаи ҳуқуқвайронкунии маъмурии Ҷумҳурии Тоҷикистон ва дигар масъалаҳоро  баррасӣ намуда, пешниҳодҳои судманд баён доштанд.