САЁҲАТИ РӮЗИ ИСТИРОҲАТӢ. Донишҷӯёни Донишкадаи соҳибкорӣ ва хизмат ба сайёҳони Германия дараи Ромитро муаррифӣ намуданд

ДУШАНБЕ, 04.04.2018 /АМИТ «Ховар»/. Садорати кафедраи туризми Донишкадаи соҳибкорӣ ва хизмати Тоҷикистон иқдом гирифтааст, ки рӯзҳои истироҳат барои донишҷӯёни ихтисосҳои туризми донишкада саёҳати рӯзиистироҳатӣ анҷом диҳад. Мақсад аз баргузории саёҳати рӯзиистироҳатӣ шинос шудани донишҷӯён бо хатсайрҳои сайёҳии минтақаҳои сайёҳии наздишаҳрӣ мебошад.  Маҳз бо ҳамин мақсад чанд рӯз қабл донишҷӯёни фаъоли ихтисосҳои туризми донишкада-аъзои маҳфили илмии донишҷӯён- «Ҷаҳони саёҳат» бо  роҳбарии устодонашон дар дараи Ромити шаҳри Ваҳдат саёҳати якрӯза анҷом доданд.

Дар раванди саёҳати якрӯза донишҷӯён манзараҳои зебою нотакрори дараи Ромити шаҳри Ваҳдатро ба меҳмонони немис, ки дар дараи Ромит ба ҳайси сайёҳ қарор доштанд, муаррифӣ намуданд. Донишҷӯён ҳангоми саёҳати якрӯзаи худ дар якҷоягӣ бо меҳмонони немис аз истироҳатгоҳҳои «Кайҳон», «Явроз» ва «Дониш» дидан карданд. Онҳо ҳангоми саёҳат дар дараи Ромит донишҳои амалии худро оид ба тарзи дурусти ташкили саёҳат барои сайёҳони хориҷӣ такмил дода, аз тамошои манзараҳои дилфиреб таассуроти хуб бардоштанд.

Бояд ёдрас шуд, ки дараи Ромит дорои иқтидори беандозаи сайёҳӣ буда, бо таҳкими раванди бунёди иншооти инфрасохтори замонавӣ метавонад ба яке аз мавзеъҳои нотакрори сайёҳии экологӣ, табобатию истироҳатӣ ва шикор табдил ёбад.

Донишкадаи соҳибкорӣ ва хизмати Тоҷикистон вобаста ба Соли рушди сайёҳӣ ва ҳунарҳои мардумӣ иқдоми ташкили хатсайрҳои сайёҳии рӯзиистироҳатиро минбаъд низ чиҳати боздид аз дараҳои Ромит (макони сайёҳии «Ёс»), ноҳияи Варзоб (дараи Оҷук), ноҳияи Файзобод,  шаҳри Норак, шаҳри Роғун ва Искандаркӯл анҷом медиҳад.