Дар Душанбе масоили идоракунии давлатӣ дар татбиқи сиёсати давлатии рушди сайёҳӣ ва ҳунарҳои мардумӣ баррасӣ гардид

ДУШАНБЕ, 03.05.2018 /АМИТ «Ховар»/. Кумитаи рушди сайёҳии назди Ҳукумати Ҷумҳурии Тоҷикистон дар якҷоягӣ бо Донишкадаи идоракунии давлатии назди Президенти Ҷумҳурии Тоҷикистон зери унвони “Идоракунии давлатӣ дар татбиқи сиёсати давлатии рушди сайёҳӣ ва ҳунарҳои мардумӣ” конфронси илмӣ-амалӣ доир намуд.

Дар кори конфронс Ширин Амонзода, муовини Раиси Кумитаи рушди сайёҳии назди Ҳукумати Ҷумҳурии Тоҷикистон, Лутфия Абдулхолиқзода, ректори Донишкадаи идоракунии давлатии назди Президенти Ҷумҳурии Тоҷикистон, Олимшоҳ Меҳрӣ, мушовири бахши ёрдамчии Президенти Ҷумҳурии Тоҷикистон оид ба масъалаҳои кадрӣ, Бибиосия Аюбӣ, муовини директори Агентии хизмати давлатии назди Президенти Ҷумҳурии Тоҷикистон, Шералӣ Ганҷалзода, муовини якуми вазири нақлиёти Ҷумҳурии Тоҷикистон, Ҷамшед Ҷамшедов, муовини ректори Донишкадаи хизмати давлатӣ, сардорони шуъбаҳои рушди сайёҳии мақомоти иҷроияи ҳокимияти давлатии вилоятҳои Суғду Хатлон ширкат ва суханронӣ намуданд.

Тавре ба АМИТ “Ховар” аз Кумиати рушди сайёҳӣ хабар доданд, зимни суханронии хеш маърӯзачиён вобаста ба омодасозии кадрҳои болаёқат дар соҳаи сайёҳӣ бо мақсади баланд бардоштани сатҳу сифати хизматрасонӣ ва мутобиқати он ба бозори меҳнат, донандагони таърих, фарҳанг, адабиёт, забонҳои хориҷӣ, технологияҳои муосири иттилоотӣ ибрози назар карданд.

Ёдовар мешавем, ки тибқи нақша-чорабиниҳои тасдиқгардида баргузории чунин конфронсу ҳамоишҳо вобаста ба омодасозии кадрҳои соҳаи сайёҳӣ дар тамоми  муассисаҳои таълимии кишвар баргузор карда мешаванд.