Дар Суғд Фестивал-озмуни вилоятии ҳунарҳои мардумӣ гузаронида мешавад

ДУШАНБЕ, 20.07.2018. /АМИТ «Ховар»/. Дар вилояти Суғд бахшида ба Соли рушди сайёҳӣ ва ҳунарҳои мардумӣ ва 27-солагии Истиқлолияти давлатии Ҷумҳурии Тоҷикистон моҳҳои июл–ноябри соли равон Фестивал-озмуни вилоятии ҳунарҳои мардумӣ гузаронида мешавад.

Тавре ба АМИТ «Ховар» аз Хадамоти матбуоти раиси вилояти Суғд иттилоъ доданд, дар Фестивал-озмуни вилоятӣ ҳунарҳои мардумӣ аз рӯи самтҳои бофандагӣ, дӯзандагӣ, армуғонсозӣ, кулолгарӣ, оҳангарӣ, чӯбкорӣ, ресандагӣ, чармгарӣ, рассомӣ пешниҳод карда мешаванд.

Ҳадаф аз баргузории Фестивал-озмуни вилоятӣ рушду инкишоф додани ҳунарҳои мардумӣ, муаррифии таърихи пурғановати миллат, эҳёи суннатҳои асил, тарғиби либоси миллӣ, тараққӣ додани санъати ҳунармандӣ, муаррифии ширкатҳои сайёҳӣ, ҳавасмандгардонии моддӣ ва маънавии ҳунармандон мебошад.

«Дар Фестивал-озмун шаҳру ноҳияҳои вилоят бо пешниҳоди маҳсулоти ҳунармандӣ, таомҳои миллӣ ва барномаи пурмазмуни фарҳангӣ метавонанд иштирок намоянд», — афзуд манбаъ.

Ба ғолибони  Фестивал-озмун дар ҳар самт барои ҷойҳои якум, дуюм ва сеюм мутаносибан 3 000 сомонӣ, 2 000 сомонӣ ва 1 000 сомонӣ мукофотпулӣ дода мешавад.

Барои барномаи беҳтарини фарҳангӣ низ тақдими ҷоизаҳои пулӣ дар назар дошта шудааст.