Нӯъмон Абдуғаффорзода: Роҳбалад на танҳо забонҳои хориҷӣ, балки таъриху фарҳангро низ бояд хуб донад

ДУШАНБЕ, 30.07.2018. /АМИТ «Ховар»/. Омода кардани роҳбалад кори осон набуда, он вақт мехоҳад ва Кумитаи рушди сайёҳии назди Ҳукумати Ҷумҳурии Тоҷикистон кӯшиш карда истодааст, ки дар якҷоягӣ бо муассисаҳои таълимии кишвар роҳбалодони ҳирфаӣ омода намояд. Ин нуктаро раиси Кумитаи рушди сайёҳӣ Нӯъмон Абудғаффорзода имрӯз, зимни нишасти матбуотӣ баён намуд.

«Роҳбаладон дар баробари донистани забонҳои хориҷӣ, бояд аз таъриху фарҳанги халқи худ бохабар бошанд. Зеро сайёҳон маҳз тавассути онҳо дар бораи Тоҷикистон тасаввурот пайдо мекунанд. Бардошти сайёҳон аз бисёр ҷиҳат аз роҳбаладон вобаста аст. Бинобар ин, мо кӯшиш карда истодаем, ки роҳбаладон дар баробари донистани забонҳои хориҷӣ таъриху фарҳанги халқи тоҷикро хуб омӯзанд ва ҷумҳуриро ба сайёҳон ба таври шоиста муаррифӣ кунанд»,-зикр намуд Нӯъмон Абудғаффорзода.

Мавриди зикр аст, ки Кумитаи мазкур навтаъсис буда, дар самти омода намудани роҳбаладони ҳирфаӣ бо муассисаҳои таълимӣ ва ширкатҳои сайёҳӣ ҳамкории зичро ба роҳ мондааст.