Ҷаласаи навбатии Шӯрои ИДМ оид ба сайёҳӣ соли 2019 дар шаҳри Самарқанди Ӯзбекистон баргузор мегардад

ДУШАНБЕ, 10.08.2018. /АМИТ «Ховар»/. Тавре қаблан иттилоъ дода будем, имрӯз дар шаҳри Душанбе  ҷаласаи Шӯрои Иттиҳоди Давлатҳои Мустақил оид ба сайёҳӣ доир гардид, ки дар он роҳбарон ва намояндагони ниҳодҳои сайёҳии кишварҳои аъзои ИДМ, аз ҷумла  Қазоқистон, Қирғизистон, Беларус, Арманистон, Россия, Ӯзбекистон ва Тоҷикистон ширкат намуданд.

Хабарнигори АМИТ «Ховар», ки иштирокчии бевоситаи ҷаласа буд, иттилоъ медиҳад, ки новобаста аз он, ки чунин ҷаласа дар Ҷумҳурии Тоҷикистон бори аввал баргузор мегардад, иштирокдорон ба ташкил ва баргузории он баҳои баланд доданд.  

Дар рафти ҷаласаи Шӯро роҳбарон ва намояндагони ниҳодҳои сайёҳии кишварҳои аъзои ИДМ оид ба рушди сайёҳии давлатҳо ибрози андеша намуда, баён доштанд, ки дар Тоҷикистон барои ҷалби сайёҳони хориҷӣ тамоми шароитҳо, аз ҷумла инфрасохтори сайёҳӣ  фароҳам оварда шудаааст, ки метавонад дар оянда Тоҷикистонро ҳамчун яке аз кишварҳои сайёҳии ҷаҳон муаррифӣ намояд.

Дар ҷараёни ҷаласа ҳамчунин иштирокдорон масоили такмили сохтори институтсионалии идоракунии соҳаи сайёҳии кишварҳои узви ИДМ, рушди шарикии давлат ва бахши хусусӣ, пешбурди маҳсулоти миллии сайёҳӣ, ҳавасмандгардонии сайёҳии дохилӣ ва хориҷӣ, баланд бардоштани сатҳи рақобатпазирӣ ва ҷалби сармоягузорӣ ба соҳаи сайёҳиро баррасӣ намуданд.

Фаъолияти Шӯрои мазкур аз ҷониби иштирокдорон муҳим ва муфид арзёбӣ гардида, қарор қабул карда шуд, ки ҷаласаи навбатии Шӯро соли 2019 дар шаҳри Самарқанди Ӯзбекистон баргузор карда шавад.