Экспедитсияи байналмилалии куҳнавардӣ ҷиҳати фатҳи қуллаи Исмоили Сомонӣ пагоҳ анҷом меёбад

ДУШАНБЕ, 24.08.2018 /АМИТ «Ховар»/. Бо  дастгирии Ҳукумати Ҷумҳурии Тоҷикистон аз ҷониби Кумитаи рушди сайёҳӣ  бахшида ба Соли рушди сайёҳӣ ва ҳунарҳои мардумӣ моҳҳои июл-август Экспедитсияи байналмилалии куҳнавардӣ  ҷиҳати  фатҳи қуллаи Исмоили Сомонӣ доир карда шуд. Дар ин бора имрӯз ба АМИТ «Ховар» аз Кумитаи рушди сайёҳии назди Ҳукумати Ҷумҳурии Тоҷикистон хабар доданд.

Дар экспедимтсияи мазкур   125  нафар кӯҳнавардон аз 20 давлати дунё, аз ҷумла Россия, Қазоқистон, Қирғизистон, Полша, Испания,  Британияи Кабир, Канада, Эстония, Норвегия, Литва, Белорусия, Украина, Германия, Италия, Туркия, Чин, Юнон, Мексика, Франсия, Шведсия, Дания ва Австрия ширкат намуданд.

Қобили зикр аст, ки Қуллаи Исмоили Сомони (собиқ қуллаи «Коммунизм») 7495 метр баландӣ дошта,  баландтарин қуллаи кӯҳӣ дар қаламрави ИДМ маҳсуб меёбад.

Тибқи барномаи Экспедитсия пагоҳ, 25 август, маросими ҷамъбасти Экспедитсия  баргузор гардида, дар ноҳияҳои Лахш ва Рашт иштирокчиёни ин чорабиниро масъулини мақомот ва сокинони минтақа истиқбол менамоянд.

Мавриди зикр аст, ки Ҷумҳурии Тоҷикистон дар радифи кишварҳое қарор дорад, ки метавонад аз намуди сайёҳии куҳӣ даромади зиёд ба даст орад, зеро 93%-и қаламрави мамлакатро куҳсор ташкил медиҳад.

Дар ин замина, бо ҷалби бахши хусусӣ ва соҳибкорон бо истифода аз имтиёзҳои андозиву гумрукӣ, ки аз ҷониби Ҳукумати мамлакат роҳандозӣ гардидааст, дар мавзеъҳои куҳии барои сайёҳон ҷолиб меҳмонхонаҳои хурд дар асоси манзилҳои истиқоматии деҳотӣ, татбиқ гашта истодааст.

Ҳамзамон, аксари сайёҳони куҳнавард тавассути дучарха, автомобилҳои куҳгард ташриф меоранд, ки зимни будубош аз хизматрасонии тарабхонаву ошхона, меҳмонхона, сӯзишворӣ ва нақлиёт истифода менамоянд. Ин омил барои таъсиси ҷойҳои кори иловагӣ, баланд бардоштани сатҳи некуаҳволии мардуми маҳаллӣ заминаи  мусоид фароҳам меорад.