ДУШАНБЕ, 01.10.2018. /АМИТ «Ховар»/. Бо ташаббуси шуъбаи рушди сайёҳӣ дар минтақаи Кӯлоб бахшида ба Соли рушди сайёҳӣ ва ҳунарҳои мардумӣ ва Рӯзи байналмилалии сайёҳӣ  дар Муассисаи давлатии «Китобхонаи оммавии вилояти Хатлон ба номи С. Айнӣ дар шаҳри Кӯлоб» Конфронси илмӣ-амалӣ дар мавзӯи «Имкониятҳо ва мушкилоти соҳаи сайёҳӣ дар минтақаи Кӯлоб» доир гардид.

Пеш аз ифтитоҳи конфронс меҳмонон аз намоишҳои расмҳо, дастранҷи ҳунарҳои мардумӣ ва китобҳои омода намудаи кормандони китобхонаи вилоятӣ боздид намуданд. Конфронсро директори Китобхонаи оммавии вилояти Хатлон ба номи С. Айнӣ дар шаҳри Кӯлоб Саймуҳаммад Обидов ифтитоҳ намуд. Дар конфронс директори Маҷмааи ҷумҳуриявии осорхонаҳои Кӯлоб Ҳотам Асозода, омӯзгорон ва донишҷӯёни Донишкадаи технология ва менеҷменти инноватсионӣ дар шаҳри Кӯлоб суханронӣ намуданд.

Зикр гардид, ки сайёҳӣ яке аз соҳаҳои муҳими муаррифи таъриху фарҳанг, табиат ва анъанаҳои миллӣ ба ҳисоб меравад. Ҳамзамон баромадкунандагон оид ба имкониятҳои мавҷуда ва мушкилоти соҳаи сайёҳӣ дар минтақаи Кӯлоб ибрози андеша намуданд.

Дар конфронс зикр гардид, ки дар минтақаи Кӯлоб меҳробҳои калисоҳои даврони зардуштӣ, ки ҳазорҳо сол пеш дар онҳо оташи муқаддас фурӯзон буд, бозёфт гардидаанд. Боздид аз мақбараҳои олимони давраи зардуштӣ ва исломӣ, ҳамсафон ва авлоди пайғамбар Муҳаммад (с), ки дар ҳудуди ин ва дигар минтақаҳои вилояти Хатлон ҷойгиранд, наметавонанд дӯстдорони асотир ва афсонаҳои қадимиро бетараф гузоранд. Шаҳри Кӯлоб, инчунин ноҳияҳои Данғара, Темурмалик, Балҷувон, Восеъ, Мӯъминобод ва Шӯрообод ёдгориҳои ҷолибе доранд, ки барои наслҳо нигоҳ дошта мешаванд. Ёдгории таърихии Ҳулбук (асрҳои 9-11), мақбараҳои Мир Саид Алӣ Ҳамадонӣ (асри 14), Шақиқи Балхӣ (асри 9), Шоҳ Неъматуллои Валӣ (асри 14), Султон Увайси Қаранӣ (асри 7), инчунин Водии Сари Хосор, кӯҳҳои намаки Хоҷа Мӯъмин, кӯҳҳои зебои Чилдухтарон таваҷҷуҳи бисёриҳоро ҷалб мекунанд.

Ёдовар мешавем, ки бо дастгирии бевоситаи мақомоти иҷроияи ҳокимияти давлатии вилояти Хатлон ва роҳбарияти шуъбаи рушди сайёҳӣ дар минтақаи Кӯлоб дар шуъбаи иттилоотии Китобхона «Маркази иттилооти рушди соҳаи сайёҳӣ дар минтақаи Кӯлоб» кушода шуд. Мақсади ин марказ он аст, ки муштариён ва меҳмонон метавонанд ҳамарӯза аз ин марказ истифода намуда, маълумоти заруриро оид ба соҳаи сайёҳӣ дастрас намоянд.