Дар Душанбе конфронси ҷумҳуриявии «Ҳунарҳои мардумӣ: эҳё, ҳолат, рушд ва дурнамо» доир мегардад

ДУШАНБЕ, 29.10.2018. /АМИТ «Ховар»/. Бахшида ба Соли рушди сайёҳӣ ва ҳунарҳои мардумӣ 31 октябри соли равон дар Вазорати фарҳанги Ҷумҳурии Тоҷикистон конфронси ҷумҳуриявии илмӣ-амалӣ таҳти унвони «Ҳунарҳои мардумӣ: эҳё, ҳолат, рушд ва дурнамо» баргузор мегардад.

Тавре аз маркази матбуоти Вазорати фарҳанги Ҷумҳурии Тоҷикистон ба АМИТ «Ховар» хабар доданд, дар конфронс масъалаҳои гуногуни вобаста ба мавзӯъ, аз ҷумла «Ҳунарҳои мардумӣ -тарғибгари фарҳанги миллӣ», «Ҳунарҳои мардумӣ ва рушди сайёҳӣ» ва «Наққошии миллии тоҷикӣ ва раванди инкишофи он» баррасӣ мегарданд.

Дар конфронс роҳбарият ва намояндагони Вазорати фарҳанги Ҷумҳурии Тоҷикистон, Кумитаи рушди сайёҳии назди Ҳукумати Ҷумҳурии Тоҷикистон, Иттифоқи ҳунармандони Тоҷикистон, Ҳизби халқии демократии Тоҷикистон, Осорхонаи миллӣ, Кумитаи кор бо занон ва оила, Кумитаи кор бо ҷавонон ва варзиш, инчунин донишгоҳҳои олӣ ва осорхонаҳо иштирок мекунанд.