Гурӯҳи кории Вазорати корҳои дохилии Тоҷикистон дар ИМА масоили вобаста ба милитсияи сайёҳиро баррасӣ намуд

ДУШАНБЕ, 12.10.2018. /АМИТ «Ховар»/. Дар шаҳри Вашингтони Иёлоти Муттаҳидаи Америка вохӯрии гурӯҳи кории Вазорати корҳои дохилии Ҷумҳурии Тоҷикистон бо Директори мубориза бо маводи нашъаовар ва ҳифзи тартиботи ҷамъиятии Департаменти давлатии ИМА хонум Ниша Праер баргузор гардид.

Дар ин бора аз Вазорати корҳои дохилии ҷумҳурӣ ба мухбири АМИТ «Ховар» иттилоъ дода, афзуданд, ки дар мулоқот Вазоратро сардори Раёсати кадрҳо ва кор бо ҳайати шахсӣ, Ҳамоҳангсози миллӣ оид ба ислоҳоти милитсия, сардори Сармаркази иттилоотӣ-таҳлилӣ, сардори шуъбаи милитсия оид ба масъалаҳои экологӣ ва дигарон намояндагӣ карданд.

Ба иттилои манбаъ, ҷонибҳо масъалаи ҳамкорӣ дар самти ислоҳоти милитсия, қайди ягонаи ҷиноятҳо, терроризм, экстремизм ва масоили вобаста ба милитсияи сайёҳиро баррасӣ намуданд.
«Намояндагони ВКД бо Политсияи муштараки давлатии таваққуфгоҳи минтақаи Анакостии шаҳри Вашингтон мулоқот намуда, бо фаъолияти амалии ин политсия дар қаламрави ИМА шинос шуданд»,- хабар доданд аз ВКД.

Ёдовар мешавем, ки сафари хизматии гурӯҳи кории Вазорати корҳои дохилии Ҷумҳурии Тоҷикистон дар ИМА идома дорад.