Ҷавонони фаъоли гурӯҳи «Авангард» аз мавзеъҳои таърихию фарҳангии Бухорову Самарқанд боздид намуданд

ДУШАНБЕ, 27.11.2018. /АМИТ «Ховар»/. Аз 23 то 25 ноябри соли равон як зумра  ҷавонони фаъоли гурӯҳи «Авангард»-и  Вазорати корҳои дохилии Ҷумҳурии Тоҷикистон бо мақсади шиносоӣ аз мавзеъҳои таърихию фарҳангии шаҳрҳои Бухорову Самарқанди Ҷумҳурии Ӯзбекистон ба ин мамлакати дӯст сафар намуданд.      

Тавре аз Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, гурӯҳи кориро мушовири калони Вазири корҳои дохилӣ, полковники милитсия Мансур Бухоризода роҳбарӣ намуда, ӯро сардори Хадамоти пешгирии ҳуқуқвайронкунӣ байни ноболиғону ҷавонон, устодони Академияи ВКД ва ҷавонон ҳамроҳӣ намуданд.

Ба иттилои манбаъ, сафари мазкур дар доираи ҳамкории мутақобилан судманди вазоратҳои корҳои дохилии Ҷумҳурии Тоҷикистон ва Ҷумҳурии Ӯзбекистон, ки бо ташаббуси роҳбарони ду давлат муҳтарам Эмомалӣ Раҳмон ва Шавкат Мирзиёев ба сатҳи нисбатан нав баромадааст, ба роҳ монда шуд.

«Дар гузаргоҳи сарҳадии «Саразм»-и шаҳри Панҷакент гурӯҳи кориро Ҳокими ноҳияи Ургути вилояти Самарқанд ва намояндагони Вазорати корҳои дохилии Ҷумҳурии Ӯзбекистон гарму ҷушон истиқбол намуда, сипас ҳайати гурӯҳ аз ҷойҳои таърихии шаҳрҳои Бухоро ва Самарқанд боздид намуданд»,-илова намуд манбаъ.

Гурӯҳи ҷавонони тоҷик аз мавзеъҳои таърихии шаҳрҳои Бухоро ва Самарқанд, аз қабили «Гӯри Амир», Мадрасаи «Биби Хонум», мақбараи «Баҳовиддини Нақшбанд», «Расадхонаи Улуғбек», «Регистон», масҷиди «Имом Ал-Бухорӣ» ва ғайра дидан намуд.

Таърихи чандинасраи ин ду миллати бо ҳам дӯсту бародар бори дигар собит менамояд, ки онҳо тӯли давраҳои тӯлонии таърихӣ тавонистанд маданияту фарҳанги хешро то имрӯз нигоҳ дошта, ба ҷаҳониён муаррифӣ намоянд.