Дар Душанбе нахустин Форуми илмии донишҷӯёни муассисаҳои таҳсилоти олӣ оид ба сайёҳӣ баргузор мегардад

ДУШАНБЕ, 05.11.2018 /АМИТ «Ховар»/. 9-10 ноябри соли 2018 бахшида ба Соли рушди сайёҳӣ ва ҳунарҳои мардумӣ бо ташаббуси Кумитаи рушди сайёҳӣ дар ҳамбастагӣ бо Мақомоти иҷроияи ҳокимияти давлатии шаҳри Душанбе ва Донишкадаи соҳибкорӣ ва хизмати Тоҷикистон таҳти сарпарастии Президенти Федератсияи футболи Тоҷикистон Рустами Эмомалӣ нахустин Форуми илмии донишҷӯёни муассисаҳои таҳсилоти олӣ таҳти унвони «Тоҷикистон дар фазои сайёҳии ҷаҳонӣ аз нигоҳи донишҷӯёни риштаи сайёҳӣ» баргузор мегардад.

Тавре аз Кумитаи рушди сайёҳӣ ба АМИТ «Ховар» хабар доданд, дар кори форум намояндагон ва донишҷӯёни донишгоҳу донишкадаҳо ва коллеҷу литсейҳои шаҳру ноҳияҳои ҷумҳурӣ иштирок менамоянд.

Дар доираи форум як қатор озмунҳо, аз ҷумла намоиши беҳтарини сайёҳӣ ва ҳунарҳои мардумӣ, акси беҳтарин, нақшаи беҳтарини тиҷоратӣ, мақолаи беҳтарин ва беҳтарин рӯнамоӣ ҷамъбаст гардида, ҳамзамон барои меҳмонони аз минтақаҳо омада саёҳати шоми Душанбе ташкил карда мешавад.

Баъд аз ҷаласаи пленарӣ кори Форум дар ду бахш – «Нақши саноати соҳаи сайёҳӣ дар рушди иқтисодиёти Ҷумҳурии Тоҷикистон» ва «Раванди омодакунии мутахассисони соҳаи сайёҳӣ дар Тоҷикистон: ҳолат ва дурнамо» идома меёбад.

Инчунин 10 ноябр устодон ва донишҷӯёни аз минтақаҳо омада дар Фестивали «Оши палав», ки дар шаҳри Душанбе баргузор мегардад, иштирок менамоянд.

Мақсад аз гузаронидани Форум мусоидат намудан ба такмили қобилияти таҳлилӣ ва таҳқиқии ҷавонони муҳассил дар самти сайёҳӣ ва арзёбии андешаҳои ҷавонони донишҷӯ перомуни рушди соҳаи сайёҳӣ дар кишвар мебошад.