«МЕРАВЕМ, МЕХӮРЕМ!» — ДАР ТОҶИКИСТОН. Ҷон Уоррени британӣ аз кӯҳҳои Фон ба ваҷд меояд, пахта мечинад, аз ангурзор дидан мекунад ва бо зебосанамҳои тоҷик шинос мешавад

ДУШАНБЕ, 23.11.2018. /АМИТ «Ховар»/. Барандаи барномаи маъруфи шабакаи телевизиони «НТВ»-и Россия «Меравем, мехӯрем!» («Поедем, поедим!») Ҷон Уоррен аз Тоҷикистон дидан кард.

Барномаи «Меравем, мехӯрем!» дар бораи ошпазӣ ва сайру саёҳат буда, дар шабакаи телевизиони «НТВ» намоиш дода мешавад.

Зимни таҳияи барнома дар Тоҷикистон Уоррен аз кӯҳҳои Фон ва меҳмоннавозии мардуми деҳаи кӯҳистон ба ваҷд омад. Ӯ ҳамчунин дар пахтазор меҳнат карда, аз ангурзор дидан намуд ва танӯр-кабоби тоҷикиро чашид.

Илова бар ин, Ҷон Уоррен дар Искандаркӯл шино карда, бо дунёи мӯди миллӣ ва зебосанамҳои тоҷик шинос шуд.

Дар охир ин барандаи барномаи маъруф ҳамчун ошпази маҳаллӣ таоми лазиз — мастоба омода кард. Тааҷҷубовар ин аст, ки ба назари Уоррен ин хӯрок ба палави обакӣ монанд мебошад, на ба чизи дигар.

Ёдовар мешавем, ки чанде пеш дар шабакаи дигари телевизиони Россия- «Пятница» барномаи «Орел и решка», ки ба Тоҷикистон ва шаҳри Душанбе  бахшида шуда буд, намоиш дода шуд. Баъди таҳияи барнома барандагони он зикр карданд, ки онҳо аз ин кишвари офтобӣ ва меҳмоннавоз беҳтарин таассурот гирифтанд. Ва, чун анъана, дар интиҳои саёҳати худ шишаеро бо 100 доллари ИМА пинҳон карда, барои дар куҷо пайдо кардани он луқма доданд.

Имрӯз барномаҳои сайёҳӣ, мисли саёҳат хеле маъмул мебошанд, зеро ба кишварҳо ва шаҳрҳои гуногуни олам сафар кардан, аз манзараҳои зебою нотакрори ин ё он давлат ҳаловат бурдан ва аз анъанаву ҷойҳои таърихӣ, фарҳангу оини одамон бохабар шудан бисёр шавқовар ва таъсирбахш аст. Ҳар як инсон хӯроки лазиз хӯрданро дӯст медорад, аз ин рӯ барои ҳама донистани он, ки дар гӯшаҳои гуногуни дунё чӣ гуна хӯрокҳо омода мекунанд, хеле шавқангез аст.

«Аз ҳар лаҳзаи саёҳат ҳаловат баред. Хӯрокҳои навро бичашед, нӯшокиҳои маҳаллиро бинӯшед, забони бегонаро омӯзед, кӯшиш намоед, ки  ба фарҳанг ҳамроҳ шавед», — мегӯяд Ҷон Уоррен, барандаи барномаи «Меравем, мехӯрем!».

Бояд гуфт, ки Ҷон Уоррен дар Майами таваллуд шуда, дар Британия ба воя расидааст, вале аз хурдсолӣ ба кишварҳои собиқ Иттиҳоди Шӯравӣ, аз ҷумла ҷумҳуриҳои Осиёи Марказӣ шавқ дошт. Дар 12-солагӣ ӯ аллакай бо забони русӣ озодона суҳбат мекард, китобҳои нависандагону шоирони Шӯравиро мутолиа менамуд ва ба хӯрокҳои мардумони мо рағбат дошт.

Баъди таҳсил дар донишгоҳ Ҷон ба Москва кӯчид ва муддати бист сол дар Россия зиндагӣ кард. Ӯ ҳатто дар вилояти Москва корхонаи хусусии истеҳсоли маҳсулоти гӯштии худро ифтитоҳ кард. Акнун ӯ имкон дорад, ки ба саросари ҷаҳон сафар намояд ва бо анъанаҳои ошхонаҳои ин ё он кишвар шинос гардад. Уоррен тадқиқотро аз Россия оғоз кард ва қариб ба ҳамаи шаҳрҳои он ҳамроҳ бо гурӯҳи наворбардорон сафар намуд. Ӯ аллакай дар Эрон, Чин, Озарбойҷон ва Ӯзбекистон буд ва акнун дар Тоҷикистони офтобӣ аст.

Нашри барномаи ошпазии «Меравем, мехӯрем!»-ро дар бораи Тоҷикистон метавон рӯзи шанбе, 24 ноябр, соати 15:05 ба вақти Душанбе (13:05 ба вақти Москва) дар шабакаи телевизиони «НТВ»-и Россия тамошо кард.