«ПУБЛИТСИСТИКАИ САЛОМИДДИН МИРЗОРАҲМАТОВ – МУАРРИФИ ЧЕҲРАҲОИ ТАЪРИХӢ ВА СИЁСӢ». Таҳти ин унвон дар Китобхонаи миллии Тоҷикистон суҳбати «мизи мудаввар» доир гардид

ДУШАНБЕ, 15.12.2018./АМИТ «Ховар»/. Имрӯз дар Китобхонаи миллии Тоҷикистон бо ташаббуси Дастгоҳи марказии ҲХДТ мизи гирд дар мавзӯи «Публитсистикаи Салоҳиддин Мирзораҳматов —  муаррифи  чеҳраҳои таърихӣ ва сиёсӣ» доир гардид.

Тавре хабарнигори АМИТ «Ховар» иттилоъ дод, дар ин ҳамоиш инчунин муаррифии китоби тозанашри ин  Саломиддин Мирзораҳматов «Оинаи каҷи демократияим  тоҷик» («Кривое зеркало таджикской демократии»), ки ба забони русӣ нашр шудааст,  низ барои ширкатдорони ин «мизи гирд»  муаррифӣ карда шуд.

Сармуҳаррири «Минбари халқ» — нашрияи марказии ҲХДТ, номзади илмҳои филологӣ, дотсент Бахтиёр Ҳамдамов, ки модератори ин нишаст буд, дар ибтидо номаи Саломиддин Мирзораҳматовро, ки ба аҳли нишаст аз кишвари Қазоқистон фиристондааст, қироат кард.

Ҳадаф аз баргузории ин нишаст ба  насли ҷавон фаҳмонидан ва талқин намудани ин ҳақиқат аст, ки  ҳар  кассе, ки ҳисси миллӣ ва ифтихори ватандорӣ дорад, хоҳ дар дохили кишвар ва хоҳ берун аз марзи он   метавонад ба Ватани худ хизмат куна два  дар муаррифии кишвари хеш саҳмгузор бошад.

Дар ин маҳфили илмию назариявӣ Раиси Иттифоқи нависандагони Тоҷикистон,  Шоири халқии Тоҷикистон, дорандаи Ҷоизаи давлатии ба номи Абӯабдулло Рӯдакӣ Низом Қосим, нависанда ва публитсисти собиқадор Бахтиёр Муртазоев, роҳбари дастгоҳи ҲХДТ Абдураҳмон Хонов, устоди факултаи рӯзноманигории Донишгоҳи славянии Россия ва Тоҷикистон доктори илмҳои филология Абдусаттор Нуралиев,   драманавис Ҷумъа Куддус ва як қатор журналистону пажӯҳишгарони ин соҳа аз ҷумлаи аспирантону олимони ҷавон ширкат ва суханронӣ карда, дар бораи  маҳорату истеъдоди журналист ва публисисти шинохта Саломиддин Мирзораҳматов  сухан изҳори андеша намуданд.

Адиби шинохта Бахтиёр Муртазоев зимни маърӯзаи худ дар мавзӯи «Аллома Бобоҷон Ғафуров ва сарнавишти шогирди ӯ», ки фарогири масоили марказии очеркҳои таърихии Саломиддин Мирзораҳматов буд,  забон, мавзӯъ ва мундариҷаи  ин очеркҳоро ба ҳозирин аз лиҳози таҳлилӣ баррасиву бозгӯ кард.

Дар маърӯзаи Ҷумъа Куддус далелҳои таърихӣ дар публитсистикаи Саломиддин Мирзораҳматов ба риштаи таҳлил кашида шуд.
Дар ин ҳамоиш бори дигар собит гардид, ки воқеаҳои таърихӣ  ва инъикоси онҳо дар журналистика ҳамеша актуалӣ хоҳад буд ва асли журналистика низ ҳамин аст.

Ногуфта намонад, ки падидаи ба забони русӣ навиштани журналистони тоҷик дар солҳои 80 — 90 — и асри гузашта дар мисоли публитсистикаи Отахон Латифӣ, Нур Табаров, Ҳулкар Юсупов, Саломиддин Мирзораҳматов ва дигарон мактаби хоси журналистӣ буда, яке аз сарчашмаҳои муҳими муаррифии Тоҷикистон дар арсаи байналмилалӣ маҳсуб мегардад.