ТАҚВИМИ АМИТ «ХОВАР»: имрӯз 20 январ, якшанбе, 20-умин рӯзи соли 2019 аст

20 январи соли 2008 бо иштироки Президенти Ҷумҳурии Тоҷикистон Эмомалӣ Раҳмон ва муовини Сарвазири Федератсияи Россия Сергей Наришкин дар ноҳияи Данғара агрегати якуми Неругоҳи барқи обии «Сангтӯда-1» дар фазои тантанавӣ ба кор дароварда шуд.

***

9 сол пеш, 20 январи соли 2010 Ҷумҳурии Тоҷикистон Созишнома оид ба таҳияи лоиҳаи хати интиқоли барқи «CASA-1000»- ро  тасдиқ намуд.

***

Дар ин рӯзи соли 2016 дар шаҳри Душанбе Пешвои миллат муҳтарам Эмомалӣ Раҳмон дар ҷаласаи якҷояи Маҷлиси миллӣ ва Маҷлиси намояндагон Паёми навбатии худро ба Маҷлиси Олии Ҷумҳурии Тоҷикистон ирсол намуда, зимни он вазъи кунунии ҷомеаи Тоҷикистонро мавриди таҳлилу баррасӣ қарор дод ва самтҳои асосии сиёсати дохилию хориҷии давлатро барои соли 2016 ва давраи миёнамуҳлати оянда муайян карданд.

 20 ЯНВАР ТАҶЛИЛ КАРДА МЕШАВАД:

Дар Мали – Рӯзи қувваҳои мусаллаҳ.

***

Рӯзи Ҷумҳурии Крим.

 РӮЙДОДҲО:

20 январи соли 1939 аввалин шумораи рӯзномаи «Ахбори Шӯрои Олии ҶСС Тоҷикистон» нашр шуд.

***

20 январи соли 2003 дар шаҳри Душанбе маросими рӯнамоии хатсайри нави ҳавоии «Алмаато-Душанбе-Алмаато» баргузор гардид.

 ***

5 сол пеш, 20 январи соли 2014 дар Маркази намоишгоҳи байналмилалии Абу-Дабӣ («ADNEC») Саммити байналмилалии «Энергияи оянда -2014» баргузор гардид.

***

Дар ин рӯзи соли 1892 дар шаҳри Спрингфилд (ИМА) миёни донишҷӯён аввалин мусобиқаи расмии баскетбол баргузор гардид.

***

20 январи соли 1925 созишномаи Иттиҳоди Шӯравӣ ва Япония дар бораи принсипҳои асосии муносиботи мутақобила (Шартномаи Пекин – 1925) ба имзо расид, ки он муносиботи дуҷонибаи дипломатӣ ва ҳамкории консулиро миёни Иттиҳоди Шӯравӣ ва Япония ба миён гузошта буд.  

 ИНЧУНИН ДАР ИН РӮЗ …

Соли 2017 Вазири фарҳанги Ҷумҳурии Тоҷикистон хабар дод, ки Тоҷикистон барои ба феҳристи ғайримоддии ЮНЕСКО ворид намудани «чакан», «атлас» ва «чавгон» наминатсия пешниҳод намуд.

***

Соли 1958 дар Лондон аввалин радарҳои назоратӣ барои санҷиши суръати мошинҳо муқаррар карда шуданд.

Тақвими моро дар ин гӯша

шореҳ Шукӯҳи ДАЛЕР варақ мезанад