Дар шаҳри Риёзи Арабистони Саудӣ ба ифтихори Наврӯзи байналмилалӣ маҳфили идона баргузор гардид

ДУШАНБЕ, 13.03.2019. /АМИТ «Ховар»/. Дар шаҳри Риёзи Арабистони Саудӣ бо ташаббуси якҷояи кишварҳои ҳавзаи Наврӯз маҳфили пуршукӯҳи Наврӯзи байналмилалӣ баргузор карда шуд. Дар ин бора АМИТ «Ховар» бо истинод ба  Вазорати корҳои хориҷии Ҷумҳурии Тоҷикистон хабар медиҳад.

Бино ба иттилои манбаъ, бо иқдоми Сафорати Тоҷикистон фарҳанги воло ва тамаддунофари тоҷикро дар ин маҳфил кормандони намояндагӣ, як гурӯҳ шаҳрвандони бурунмарзиамон ва ду ҳунарманди маъруфу машҳур — Қурбоналӣ Раҳмонов ва Давлат Назрӣ муаррифӣ намуданд.

Ҳунармандони варзидаи тоҷик бо ҳунари волои тоҷикона ва савту навои наврӯзӣ дили садҳо нафар ҳозирини ин маҳфили дилороро тасхир намуданд. Намоиши ҳунари волои онҳо иқдоми хубе буд барои ҷалби ҳаводорони суруду мусиқӣ ва фарҳанги зебои мардуми тоҷик дар ин кишвар бахшида ба Рӯзҳои фарҳанги Тоҷикистон дар Арабистони Саудӣ, ки баргузор намудани он имсол дар назар аст.

Дар майдони баргузории маҳфил ҳамчунин маҳсули дасти ҳунармандони тоҷик намоиш дода шуд, ки таваҷҷуҳи зиёди мардуми ҷамъшударо ба худ ҷалб намуд.

Ин маҳфили зебо ва муаррифии шоистаи Тоҷикистон барои афзун намудани шумораи сайёҳони араб ба кишвари биҳиштосои мо дар Солҳои рушди деҳот, сайёҳӣ ва ҳунарҳои мардумӣ заминаи мусоид гардид.