Дар ноҳияи Данғара маркази хизматрасонӣ ва иттилоотию сайёҳӣ ифтитоҳ гардид

ДУШАНБЕ, 22.05.2019. /АМИТ «Ховар»/. Дирӯз дар ҷамоати деҳоти «Корез»-и ноҳияи Данғараи вилояти Хатлон маркази хизматрасонӣ ва иттилоотию сайёҳӣ ифтитоҳ гардид. Дар ин бора ба АМИТ «Ховар» аз Кумитаи рушди сайёҳӣ хабар доданд.

«Дар заминаи роҳандозии имтиёзҳои андозию гумрукӣ, ки аз ҷониби Ҳукумати Ҷумҳурии Тоҷикистон роҳандозӣ шудааст, соҳибкорони ватаниро ба рушди инфрасохтори сайёҳӣ ҳавасманд гардонид.

«Дар ҷамоати деҳоти «Корез»-и ноҳияи Данғараи вилояти Хатлон аз ҳисоби соҳибкори маҳаллӣ маркази хизматрасонӣ иборат аз се ошёна бунёд шуда, мавриди истифода қарор гирифт. Дар ошёнаи якум маркази иттилоотии сайёҳӣ ва мағозаи фурӯши армуғон ҷойгир шудаанд. Ошёнаи дуюм барои ҷойи хоби сайёҳон пешбинӣ шудааст. Дар ошёнаи сеюм ошхона ва толори варзишӣ барои сайёҳон ҷойгир аст. Дар марказ 10 нафар бо ҷойи кори доимӣ таъмин гардидаанд», — зикр намуд манбаъ.

Ҳамчунин, дар ҷамоати мазкур як меҳмонхонаи нав бо 12 утоқ мавриди истифода қарор дода шуд, ки дар он 10 нафар бо ҷойи кори доимӣ таъмин шуданд.

Бояд тазаккур дод, ки иншооти мазкур ба хатсайри сайёҳии Душанбе-Данғара-Балҷувон-Ховалинг-Муъминобод-Душанбе ворид гардидааст, ки ширкатҳои сайёҳӣ аз он васеъ истифода менамоянд.

Ёдгориҳои меъмории ноҳия ин Мақбараи Шаҳид, Мақбараи Хоҷа Шақиқи Балхӣ, Мақбараи Мавлоно Тоҷиддин, Мақбараи Мавлоно Обиддин, Оромгоҳи Сари Қалъа, Оромгоҳи Мавлоно Файзулло, Оромгоҳи Мавлавӣ Шамс, Оромгоҳи Мирсайид Ибод, Мақбараи Хоҷаи Заррин, Мақбараи Аслиҳо, Мақбараи Мулло Амон ва Масҷиди Ҳазрати Мавлоно мебошанд.

Дар ноҳияи Данғара инфрасохтори сайёҳӣ марҳила ба марҳила рушд намуда, айни замон дар ҳудуди ноҳия 3 меҳмонхона, 2 осорхона, 3 мавзеи фарҳангӣ-фароғатӣ, 2 нуқтаи хизматрасонии сарироҳӣ ва 1 адад ташнобхонаи ба роҳи автомибилгард наздик фаъолият намуда, ба меҳмонони дохилию хориҷӣ хизмат расонида мешавад.