Имрӯз «Ҳафтаи илм, технология, инноватсия ва ихтироъкории наврасону ҷавонони шаҳри Душанбе» оғоз мегардад

ДУШАНБЕ, 20.05.2019. /АМИТ «Ховар»/. Тавре қаблан хабар додем, нимаи дуюми имрӯз, 20 май дар Муассисаи давлатии «Душанбе-Плаза»  «Ҳафтаи илм, технология, инноватсия ва ихтироъкории наврасону ҷавонони шаҳри Душанбе» оғоз мегардад.

Дар ин бора  директори Маркази технологияи информатсионӣ ва коммуникатсияи назди Сарраёсати маорифи шаҳри Душанбе Шавкат Норматов ба мухбири АМИТ «Ховар» иттилоъ дод.

Тибқи иттилои манбаъ,  «Ҳафтаи илм, технология, инноватсия ва ихтироъкории наврасону ҷавонони шаҳри Душанбе»  аз 20 то 25 майи соли равон баргузор мегардад ва дар доираи он  бо иштироки наврасону ҷавонон доир ба илмомӯзӣ, пешбарии корҳои илмӣ-таҳқиқотӣ, омӯзишу аз худ кардани технологияи иттилоотиву коммуникатсионӣ, ташвиқи ғояҳои навовариву ихтироъкорӣ  доиршавии  Форуми наврасону ҷавонон, чорабиниҳо ва фаъолияти гуногуни оммавӣ дар назар дошта шудааст.

Дар ҳафтаи мазкур дар баробари хонандагону муаллимон олимону мутахассисон, коршиносон ва намояндагони воситаҳои ахбори омма фаъолона иштирок менамоянд. Дар ҷамъбасти чорабиниҳо маҷмӯаи корҳои анҷомдода ва мақолаву гузоришҳо нашр карда шуда, ғолибон бо туҳфаҳои хотиравии Кумитаи тадорукот қадрдонӣ карда мешаванд.

Мақсад аз баргузории ҳафтаи мазкур баланд бардоштани сатҳу сифати таҳсилот, ба эҷодкорӣ, навовариву ихтироъкорӣ, омӯзиши амиқи илмҳои дақиқ ҷалб намудани наврасону ҷавонон, ташаккули сатҳи фарҳанги техникӣ, ҷорӣ намудани техникаю технологияи муосир дар раванди таълим ва дастгирии ихтироъкорон мебошад.

Мавриди зикр аст, ки чорабинии мазкур соли ҳаштум аст, ки бо ташаббуси Мақомоти иҷроияи ҳокимияти давлатии шаҳри Душанбе гузаронида мешавад.