Дар хатсайрҳои автобуси №4, №13, №28, №29 ва №37 –и шаҳри Душанбе хизматрасонӣ тариқи кортҳои нақлиётӣ ба роҳ монда мешавад

ДУШАНБЕ, 21.06.2019 /АМИТ «Ховар»/. Мақомоти иҷроияи ҳокимияти давлатии шаҳри Душанбе ба таваҷҷуҳи сокинон ва меҳмонони пойтахт мерасонад, ки шурӯъ аз 24 июни соли 2019 дар хатсайрҳои автобусии №4 (Терминали мусофирбарии «Шарқ-Транс» -ҶДММ«Маром), №13 (маҳаллаи Бунёдкорон-кӯчаи Гагарин), №28 (маҳаллаи Зарафшон-Маркази ташхиси техникӣ), №29 (Беморхонаи Қарияи боло-маҳаллаи Пахтакор), №37 (маҳаллаи Бунёдкорон-маҳаллаи Қарогегин) пардохти ҳаққи роҳкиро пурра тариқи кортҳои нақлиётӣ  ба роҳ монда мешавад.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд, ин амал бо мақсади  баланд бардоштани сатҳу сифати хизматрасонӣ ба мусофирон  ба роҳ монда шудааст. Шаҳрвандон метавонанд кортҳои электронии роҳкироро аз терминалҳо ва нуқтаҳои фурӯши маҷаллаву рӯзномаҳо дастрас намоянд.

Ёдовар мешавем, ки шурӯъ   аз   1 апрели соли 2018  дар нақлиёти мусофирбари автомобилии истифодаи умуми шаҳри Душанбе —  автобусу   троллейбус  пардохти роҳкиро  пурра     ба шакли  ғайринақдӣ роҳандозӣ карда  шудааст.