Пешвои миллат Эмомалӣ Раҳмон аз хоҷагии деҳқонии «Баҳористон» дар деҳоти Оқсуи ноҳияи Данғара боздид намуданд

Сентябрь 12, 2019 10:57

ДУШАНБЕ, 12.09.2019 /АМИТ «Ховар»/. Дар ноҳияи Данғараи вилояти Хатлон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз майдони кишоварзии хоҷагии деҳқонии «Баҳористон» -и деҳоти Оқсу дидан намуда, ба ҷамъоварии пахта оғоз бахшиданд.

Хоҷагии мазкур дорои 6,67 гектар замини обӣ буда, дар 6 гектари он пахта кишт карда шудааст. Дар боқимонда заминҳо хоҷагидорон дигар навъи зироати кишоварзӣ, аз ҷумла дар майдони 0,32 гектар сабзавот, 0,15 гектар картошка ва дар масоҳати 0,20 гектар зироати полезӣ кишт намудаанд.

Тавре маълум гардид, нашъунамои ниҳоли пахта дар хоҷагии деҳқонии «Баҳористон» хуб буда, аз рӯи нишондоди олимони соҳа ҳосилнокии он ба беш аз 40 сентнер хоҳад расид.

Сарвари давлат муҳтарам Эмомалӣ Раҳмон ба нашъунамо ва ҳосилнокии пахта дар ин хоҷагӣ баҳои баланд дода, хоҷагидоронро дар оянда низ ба меҳнати ҳалол ва риояи пайвастаи талаботи муқарраргардида ҳидоят намуданд.

Иттилоъ дода шуд, ки пахтаи навъи Хуҷанд — 67 ба иқлими ноҳияи Данғара, аз ҷумла заминҳои хоҷагии деҳқонии «Баҳористон» мувофиқ буда, дар ин майдон ҳамасола аз ин навъ кишт карда мешавад.

Дигар хоҷагидорони деҳоти Оқсу низ таҷрибаи бойи пахтакорӣ доранд. Ба Президенти мамлакат иттилоъ дода шуд, ки майдони пахтазори деҳот соли равон ба беш аз 950 гектар расонида шудааст.

Кишоварзони хоҷагии деҳқонии «Баҳристон» дар кишту парвариши дигар навъи зироат низ таҷрибаи ғанӣ дошта, дар таъмини бозори истеъмолии мамлакат бо маҳсулоти тару тозаи ватанӣ саҳми назаррас мегузоранд. Аз ҳудуди хоҷагӣ то имрӯз картошка, пиёз ва дигар навъҳои сабзавот ҷамъоварӣ шуда, дар заминҳои холигардида кишти такрорӣ гузаронида шудааст.

Мавриди зикри хос аст, ки хоҷагидорон дар заминҳои кишоварзӣ кишти 3-юмро низ таҷриба гузаронида, аз он ҳосили дилхоҳ ба даст овардаанд. Имсол кишоварзони хоҷагӣ аз майдони 0,15 гектар картошка ҷамъоварӣ намуда, дар ҷойи он помидор кишт намудаанд. Баъди ҷамъоварии ҳосили помидор дар ин масоҳат кишти пиёз гузаронида шудааст ва аз он низ ҳосили хуб ба даст хоҳад омад.

Дар ҳудуди хоҷагӣ ҳамчунин 150 оилаи занбӯри асал парвариш карда мешавад ва ҳамасола занбӯрпарварон асали хушсифат ба даст меоранд.

Дар ҳамин ҷо аз ҷониби сокинони меҳнатдӯсти деҳоти Оқсу намоиши маҳсулоти кишоварзӣ ташкил карда шуд, ки аз он Пешвои миллат муҳтарам Эмомалӣ Раҳмон дидан намуданд.

Дар ҳудуди деҳоти Оқсу 3491 гектар замини корам, аз ҷумла 1970 гектар корами обӣ ва инчунин 907 гектар боғ мавҷуд аст. Дар заминҳои кишоварзӣ сокинон қариб ҳама намуди зироатро кишту парвариш намуда, ҳамасола ҳосили фаровон ба даст меоранд. Онҳо бо риояи талаботи коидаҳои агротехникӣ, истифодаи самараноку оқилонаи замин ва ба даст овардани ҳосили дилхоҳ дар таъмини бозори истеъмолӣ бо маҳсулоти тару тозаи кишоварзӣ, инчунин содироти он ба хориҷи мамлакат саҳми арзанда мегузоранд. Имсол аз деҳоти Оқсу ба миқдори 500 тонна маҳсулот ба хориҷа содир карда шудааст, ки ин нишондод нисбат ба соли гузашта 150 тонна зиёд мебошад.

Дар намоишгоҳ кишоварзон, дар маҷмӯъ сокинони деҳоти Оқсу номгӯи гуногуни ҳосили зироати кишоварзӣ, аз қабили ғалладонагиҳо, сабзавоту полезӣ ва ғайраро ба маъраз гузоштанд. Фаровонӣ ва сифати баланди маҳсулоти дар ин намоишгоҳ ба маъраз гузошташударо Сарвари давлат натиҷаи меҳнати ҳалол, истифодаи самараноку оқилонаи ҳар ваҷаб замин ва малакаи баланди касбии кишоварзон маънидод намуданд.

Боздид аз хоҷагии деҳқонии «Баҳористон» дар деҳоти Оқсуи ноҳияи Данғара 12.09.2019

Сентябрь 12, 2019 10:57

Хабарҳои дигари ин бахш

Фармони Президенти Ҷумҳурии Тоҷикистон
Фармони Президенти Ҷумҳурии Тоҷикистон
Мубодилаи барқияҳои табрикии Президенти Ҷумҳурии Тоҷикистон Эмомалӣ Раҳмон ва Амири Давлати Кувайт Шайх Мишъал ал-Аҳмад ал-Ҷобир ас-Сабоҳ
Президенти Ҷумҳурии Тоҷикистон Эмомалӣ Раҳмон бо Раиси Ҷумҳурии Исломии Эрон Масъуди Пизишкиён суҳбати телефонӣ анҷом доданд
Сарвари давлат Эмомалӣ Раҳмон бо фаъолони соҳаи саноати вилояти Суғд мулоқот намуданд
Пешвои миллат Эмомалӣ Раҳмон дар ноҳияи Бобоҷон Ғафуров ба сохтмони корхонаи ғанигардонии маъдани оҳани ҶСП «Комбинати металлургии тоҷик» санги асос гузоштанд
Маросими гусели сарони давлатҳои Қирғизистон ва Узбекистон
Иштироки сарони давлатҳои Тоҷикистон, Қирғизистон ва Узбекистон дар барномаи фарҳангии муштараки наврӯзӣ
Суханронии Президенти Ҷумҳурии Тоҷикистон Эмомалӣ Раҳмон дар Барномаи фарҳангӣ ба ифтихори ҷашни байналмилалии Наврӯз
Боздиди сарони давлатҳои Тоҷикистон, Қирғизистон ва Узбекистон аз маҷмааи Қалъаи Хуҷанд
Маросими имзои Шартнома миёни Ҷумҳурии Тоҷикистон, Ҷумҳурии Қирғизистон ва Ҷумҳурии Узбекистон дар бораи нуқтаи пайвастшавии сарҳадҳои давлатии се кишвар
Мулоқоти сеҷонибаи сарони давлатҳои Тоҷикистон, Қирғизистон ва Узбекистон