Дар Суғд бахшида ба Рӯзи милитсия 2 нуқтаи хизматрасонӣ барои сайёҳон ба истифода дода шуд

Ноябрь 9, 2019 09:10

ДУШАНБЕ, 09.11.2019. /АМИТ «Ховар»/. Дар вилояти Суғд бахшида ба Рӯзи милитсияи тоҷик  бо иқдоми шуъбаи милитсияи сайёҳии Раёсати экологӣ ва сайёҳии Вазорати корҳои дохилӣ  дар якҷоягӣ бо ширкати алоқаи мобилии «Tcell» ва ширкати мусофиркашонии «Рахш-таксӣ» барои рушди соҳаи сайёҳӣ  2 нуқтаи хизматрасонӣ ба сайёҳон  мавриди баҳрабардорӣ қарор гирифт. Яке  аз ин нуқтаҳо дар назди даромадгоҳи Боғи фарҳангӣ-фароғатии ба номи Камоли Хуҷандии  шаҳри Хуҷанд  ва дигаре  дар назди гузаргоҳи сарҳадии Ҷамоати деҳоти Сарбанди ноҳияи Спитамен ҷой гирифтаанд.

Тавре аз маркази матбуоти Вазорати корҳои дохилии Ҷумҳурии Тоҷикистон ба АМИТ «Ховар»  иттилоъ доштанд,  ин нуқтаҳо бо  мақсади хизматрасонӣ  ба сайёҳони дохиливу хориҷӣ таъсис ёфтаанд. Дар онҳо  ба сайёҳон хизматҳое,  ба мисли   роҳбаладӣ, истифодаи алоқаи мобилӣ ва  нақлиётӣ расонида мешаванд.

Дар маросими ба истифодадиҳии нуқтаҳои хизматрасонии милитсияи сайёҳӣ намояндагони милитсияи сайёҳӣ ва ширкатҳои зикршуда  иштирок доштанд.

Тавре таъкид шуд, акнун  сайёҳон бе мамониат метавонанд аз нуқтаҳои мазкур барои муоширати мобилӣ аз ширкати «Tcell» симкорти сайёҳии ройгон дастрас намоянд, ки дар тавозуни он 100 дақиқа вақт барои зангҳои телефонӣ ва 100 мегабайт интернет барои истифода давоми 10 рӯз мавҷуд аст.

Ҳамчунин ширкати алоқаи мобилии «Tcell» дар ҳудуди Боғи фарҳангӣ-фароғатии ба номи Камоли Хуҷандӣ алоқаи интернетии Wi-Fi фаъол гардонидааст, ки он низ барои таъмини сайёҳати хотирмони сайёҳон пешбинӣ шудааст.

Дар нуқтаҳои мазкур аз ҷониби маъмури забондон дархости сайёҳ қабул ва сари вақт симкорт дастрас карда мешавад. Инчунин ҳангоми зарурати истифода аз хизматрасонии роҳбалад аз ҳисоби милитсияи сайёҳӣ ва нақлиёти кирокаш аз ширкати «Рахш–таксӣ» кормандони забондон ба сайёҳон хизмат мерасонанд. Нуқтаҳои хизматрасонии милитсияи сайёҳӣ дар мавзеъҳои намоён ҷой гирифта, ба ҳар нафар муроҷиаткунанда дастрас мебошанд.

Ёдовар мешавем, ки таъсиси сохтори хизматии ба талаботи замона мувофиқ — Раёсати экологӣ ва сайёҳӣ дар Вазорати корҳои дохилӣ иқдоми саривақтии Вазири корҳои дохилӣ, генерал-полковники милитсия Рамазон Раҳимзода  буда, таъмини амнияти сайёҳон, роҳбаладии сайёҳон, ба онҳо додани маълумоти зарурӣ, расонидани кумак, ҳифзи манфиати сайёҳон, пешгирии ҷинояткорӣ дар байни сайёҳон ва нисбат ба онҳо  самтҳои фаъолияти ин Раёсатро ташкил медиҳанд.

 

Ноябрь 9, 2019 09:10

Хабарҳои дигари ин бахш

DITE-2025: Душанбе ба маркази нави сайёҳии байналмилалӣ табдил меёбад
ҚОИДАҲОИ ҲАРАКАТ ДАР РОҲРО РИОЯ НАМОЕД! Бо иштироки мототсикл ва скутер 140 ҳодисаи роҳу нақлиёт сабт гардидааст
Ҷаласаи Мушовараи якҷояи вазоратҳои корҳои дохилии Ҷумҳурии Тоҷикистон ва Федератсияи Россия баргузор гардид
Дар Душанбе ҷаласаи ҳамоҳангсози сохторҳои қудратӣ ва мақомоти ҳифзи ҳуқуқ доир гардид
Ҷаласаи комиссияи даъвати ҷумҳуриявӣ оид ба омодагӣ ба даъвати тирамоҳии хизмати ҳарбӣ доир шуд
DITE-2025. Зиёда аз 10 ҳазору 500 нафар аз Намоишгоҳи байналмилалии сайёҳии Душанбе дидан намуданд
Наҷотдиҳандагони Тоҷикистон дар тамринҳои байналмилалии ҷустуҷӯӣ ва наҷотдиҳӣ дар Британияи Кабир иштирок намуданд
Масъалаи густариши ҳамкорӣ байни шаҳри Душанбе ва Ҷазираи Киш дар соҳаи сайёҳӣ баррасӣ шуд
Дар доираи баргузории Намоишгоҳи байналмилалии сайёҳии Душанбе ҷаласаи панелӣ ва дарси маҳорат доир гардиданд
Муслим Сафоӣ аз Эрон: «Соҳаи сайёҳӣ дар Тоҷикистон дар ҳоли рушд қарор дорад»
Gallup: Тоҷикистон аз ҷиҳати амну субот ва эътимоду боварии шаҳрвандон ба мақомоти ҳифзи ҳуқуқ дар ҷойи якум қарор гирифт
Тоҷикистон ба даҳгонаи давлатҳои амнтарини ҷаҳон шомил шуд