Дар ИДМ таъсис додани комиссия оид ба муқовимат ба таҳрифсозии таърих ба нақша гирифта шудааст

ДУШАНБЕ, 12.12.2019 /АМИТ «Ховар»/.  Дар Иттиҳоди  Давлатҳои  Мустақил таъсис додани комиссияи муаррихон ва бойгонишиносони  ҳуҷҷатнигор барои муқовимат ба таҳрифкории таърих пешниҳод гардидааст,  хабар медиҳад АМИТ «Ховар» бо истинод ба хадамоти матбуоти Кумитаи иҷроияи ИДМ.

Ташаббус оид ба таъсис додани  чунин Комиссия ба Россия тааллуқ дорад. Онро аксари аъзои Шӯро оид ба  ҳамкории   башардӯстона ва Шӯро оид ба ҳамкорӣ дар соҳаи илмҳои бунёдии давлатҳои аъзои ИДМ ва инчунин Ассотсиатсияи байналмилалии донишкадаҳои таърихи кишварҳои Иттиҳоди Давлатҳои Мустақил ҷонибдорӣ намуданд.

Дар ҷаласаи муштараки Шӯро оид ба  ҳамкории башардӯстона ва Раёсати Бунёди байнидавлатии ҳамкории башардӯстонаи давлатҳои узви ИДМ, ки 9 декабр дар Брест баргузор шуд, ташаббуси мазкур бори дигар рӯзмарра   эътироф гардид. Иштирокдорони  ҷаласа ба  қароре омаданд, ки аз донишкадаи таърихи ҷаҳонии  Академияи илмҳои Россия   таҳия ва коркарди лоиҳаҳои    зарурии санадҳо, аз ҷумла,  Низомнома  оид ба таъсиси Комиссияро хоҳиш намоянд.

Комиссия дар заминаи Ассотсиатсияи байналмилалии Донишкадаҳои таърихи кишварҳои Иттиҳод амал хоҳад кард. Ба ғайр аз муаррихон ба  ҳайати он ҳамчунин  намояндагони бойгониҳо  ва дигар идораҳои  мувоҷеҳи давлатҳои аъзои ИДМ  шомил мешаванд.