Антонио Гутерриш изҳор дошт, ки СММ шояд ҳамаи барномаҳо барои соли 2020-ро иҷро карда натавонад

ДУШАНБЕ, 16.01.2020 /АМИТ «Ховар»/. СММ шояд ҳамаи барномаҳои амал, ки барои соли 2020 пешниҳод шудаанд, иҷро карда натавонад, агар кишварҳо сари вақт ва пурра ҳаққи аъзогии худро пардохт накунанд, изҳор дошт Дабири кулли СММ Антонио Гутерриш. Дар ин бора АМИТ «Ховар»  бо истинод ба «РИА  Новости» хабар медиҳад.

«Агар ҳамаи кишварҳои аъзо сари вақт ва пурра ҳаққи аъзогии худро пардохт накунанд, эҳтимол аст,  ки маблағ барои татбиқи тамоми барномаҳои барои соли 2020 пешниҳодшуда кифоя нагардад», — гуфт Гутерриш зимни суханрониаш дар чорабинии СММ.

Ӯ хотирнишон сохт, ки соли гузашта созмон дучори гаронтарин буҳрони молиявӣ дар даҳсолаи охир гардид.  Дабири кулл зикр намуд, ки ҳаҷми умумии қарзи кишварҳо дар охири соли 2019 нисбат ба охири  соли 2018 афзуд.

«Ман вазъиятро ҳамоно дақиқ назорат мекунам ва  ба кӯмаки доимии шумо умедворам, то ин ки мо ба буҳрони аз ин ҳам амиқтар дучор нашавем»,- таъкид намуд Гутерриш.

Моҳи октябр Дабири кулли СММ намояндагони корпуси дипломатиро дар Ню-Йорк дар бобати ҷиддан бад шудани вазъияти молиявии созмон огоҳ сохта буд. То 9 октябри соли 2019 беш аз 50 кишвари аъзо, аз ҷумла ИМА ҳаққи аъзогиро ба буҷаи СММ нагузарондаанд. Созмон маҷбур шуд, ки баъзе намудҳои фаъолияташро маҳдуд созад ва ба реҷаи сарфакории қароргоҳ дар Ню-Йорк гузарад.