Дабири кулли ТУТ барои баррасии вазъи коронавирус ба Чин меравад

ДУШАНБЕ, 27.01.2020 /АМИТ «Ховар»/. Дабири кулли Ташкилоти Умумиҷаҳонии Тандурустӣ (ТУТ)  Тедрос Адан  Гебрейесус  хабар дод, ки барои мулоқот бо ҳукуматдорони Чин ва коршиносон дар соҳаи нигаҳдории  тандурустӣ ва баррасии вазъият оид ба коронавируси нав ба Пекин сафар мекунад. Дар ин бора АМИТ «Ховар» бо истинод ба «Риа Новости» иттилоъ медиҳад.

«Ман ба Пекин сафар мекунам, то ин  ки  бо ҳукуматдорон ва коршиносон дар  соҳаи нигаҳдории тандурустӣ, ки барои аксуламал бар зидди коронавирус чораҷӯӣ мекунанд, мулоқот намоям. Мо бо ҳамтоёнамон аз ТУТ мехоҳем сабабҳои доман паҳн кардани ҳодисотро  фаҳмем ва ҳамкории худро бо Чин дар масъалаи таъмини минбаъдаи ҳифз аз авҷ гирифтани вирус таҳким бахшем»,- навиштааст дар аккаунти  худ дар “Твиттер” Гебрейесус.

Ӯ ҳамчунин тазаккур дод, ки мутахассисони ташкилот шабонарӯз кор мекунанд, то ин ки Чин ва аҳолии онро дар ин айёми мураккаб дастгирӣ  намоянд. Ҳамчунин ТУТ бо кишварҳое, ки дар он ҷо ин беморӣ мушоҳида мешавад, робитаи зич дорад. Ташкилот доираи васеи коршиносонро ҷалб  карда, барои тамоми кишварҳои ҷаҳон тавсияҳо таҳия менамояд ва  мекӯшад, ки низоми аксуламалро  зидди коронавирус ба кор андозад.