Дар Чин нишонаҳои нав ва роҳҳои гузариши коронавирусро шарҳ доданд

ДУШАНБЕ, 29.01.2020 /АМИТ «Ховар»/. Навъи нави коронавирус асосан бо роҳи ҳавоӣ –қатрагӣ мегузарад, вале дар натиҷаи ба чашм  расондани дастони ифлос ҳам сироят мекунад, изҳор дошт узви гурӯҳи коршиносони кумитаи давлатии Ҷумҳурии  Мардумии Чин оид ба масъалаҳои нигаҳдории тандурустӣ  Ли Синван. Дар ин бора АМИТ Ховар бо истинод ба «РИА Новости» иттилоъ медиҳад.

«Ҳама бояд ниқоб пӯшанд, қаробатро дар масофаи наздик маҳдуд намоянд. Вирус метавонад дар натиҷаи даст расондан   ба чашмоне, ки он ҷо вирус   афтодааст, паҳн шавад».  Дар марҳилаи ибтидоӣ беморӣ бо чунин нишонаҳо, ба монанди баландшавии ҳарорати бадан, беҳолӣ ва сулфаи хушк зуҳур мекунад. Дар ҳолати гирифтории сахт ба ин беморӣ душвор  шудани нафаскашӣ, нарасидани ҳаво ба мушоҳида мерасад, агар касалиҳои дигар низ мавҷуд бошанд, вазъият боз ҳам бадтар мешавад»,- шарҳ  дод  духтури  бемориҳои сироятшаванда.

Ба гуфти Ли Синван,  вақтҳои охир ҳодисаҳои шакли сабуки  2019-nCoV зиёд гаштаанд:  баъзе беморон ҳатто гирифтори шамолхӯрии шуш нашудаанд, фақат таби начандон баланд ва сулфаи кӯтоҳи хушк мушоҳида  гардид.

«Дар як қисми беморон баландшавии ҳарорати бадан қариб ки эҳсос намешавад, фақат сулфаи хушк ва  беҳолӣ  ба назар мерасад. Ин гуна шахсонро мо вақте муайян кардем, ки онҳо худашон ихтиёрӣ барои муоина омаданд. Мутобиқи қонуниятҳои бемориҳои сироятӣ,  ин гуна шахсон то андозае паҳнкунандагони вирус мебошанд, ки ин пешгирии эпидемияро то андозае мушкил месозад»,- илова намуд ӯ.

Табобати беморе, ки бо вируси нав сироят шудааст, тақрибан як ҳафта  вақтро мегирад, ба шарте ки дар ҳолати сабук идома ёбад,  ҳангоми бемории вазнин ду  ҳафта ва бештар аз ин лозим мешавад, суханашро хотима бахшид Ли Синван.

Аз рӯи маълумоти охир, теъдоди фавтидагон ба 106 нафар расид, шумораи  сироятшудагон аллакай 4,5 ҳазор одамро ташкил медиҳад. Ҳолатҳои сироятшавӣ ба ғайр аз Чин дар Кореяи Ҷанубӣ, Япония, ИМА, Тайланд,  Канада,  Ветнам,  Сингапур,  Непал,  Франсия, Австралия, Малайзия,  Камбоҷа  ва  Германия низ  ба қайд гирифта шудаанд.

Ҳукуматдорони Чин  фурӯш ва  интиқоли  ҳайвоноти ваҳширо манъ карданд, зеро эҳтимол аст, ки  маҳз  онҳо сарчашмаи  пайдошавии бемории нав бошанд. Дар бисёр шаҳрҳо карантин эълон шудааст.

  Фото: ©REUTERS