Рустами Эмомалӣ бо Андреас Протманн мулоқот намуд

ДУШАНБЕ, 29.01.2020 /АМИТ «Ховар»/.  Имрӯз Раиси шаҳри Душанбе Рустами Эмомалӣ бо Сафири Фавқулода ва Мухтори Ҷумҳурии Федеративии Германия дар Ҷумҳурии Тоҷикистон Андреас Протманн мулоқот намуд.  Дар ин бора аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд.

Тибқи иттилои манбаъ, зимни вохӯрӣ масъалаҳои марбут ба ҳолати кунунӣ ва дурнамои муносибатҳои ҳамкории мақомоти иҷроияи ҳокимияти давлатии шаҳри Душанбе бо Ҷумҳурии Федеративии Германия мавриди баррасӣ қарор гирифтанд.

Ҷонибҳо сатҳи кунунии ҳамкории мавҷударо ҳамаҷониба таҳлил намуда, самту уфуқҳои нави робитаи  мутақобилан судманд  барои ҳар ду тарафро муайян намуданд. Аз ҷумла, дар атрофи  густариши ҳамкорӣ  дар соҳаҳои тиҷоратӣ-иқтисодӣ, фарҳанг ва варзиш   мубодилаи судманди афкор сурат гирифт.

Иштирокчиёни вохӯрӣ ба роҳҳои таҳкиму густариши робитаҳои дуҷониба дар чаҳорчӯбаи ҳамкории  бародаршаҳрии байни шаҳрҳои Душанбеи Ҷумҳурии Тоҷикистон ва Ройтлингени Чумҳурии Федеративии Германия  таваҷҷуҳи махсус зоҳир карданд.

Дар доираи татбиқи амалии ҳадафи чоруми миллӣ-саноатикунонии мамлакат ҷонибҳо ба тавсеаи ҳамкории  гуногунҷанба, бахусус таъсиси корхонаҳои муштараки саноатӣ  ҳавасмандӣ  зоҳир намуданд. Зимни музокирот ҳамчунин дигар масъалаҳои мавриди таваҷҷуҳи назари тарафайн баррасӣ гардиданд. Мулоқот ба таври созанда ва дар фазои ҳусни тафоҳум  сурат гирифт.