Рустами Эмомалӣ бо корҳои бунёдӣ дар маҷмааи меъмории рамзи «Истиқлолият ва Озодӣ» шинос шуд

Январь 29, 2020 17:13

ДУШАНБЕ, 29.01.2020 /АМИТ «Ховар»/. Имрӯз Раиси шаҳри Душанбе Рустами Эмомалӣ бо ҷараёни корҳои бунёдӣ дар сохтмони  «Боғи  Истиқлолият»   бо майдони маҷмааи меъмории рамзи  «Истиқлолият ва Озодӣ»-и пойтахт шинос шуд. Боғи мазкур муҳташамтарин иншооти  ҷашнӣ дар мамлакат маҳсуб мешавад, ки бахшида ба 30-солагии Истиқлолияти давлатии Ҷумҳурии Тоҷикистон дар пойтахт бунёд мегардад.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд, зимни боздид аз  ин иншоот ба Раиси шаҳри Душанбе Рустами Эмомалӣ иттилоъ доданд, ки то имрӯз тадбирҳои вобаста ба бунёди чоҳбонии маҷмаа ва бунёди мехсутунҳо андешида  шуда, корҳо барои бунёди маҷмааи меъморӣ омода гардидаанд.

Бунёди боғи «Истиқлолият» бахшида ба 30-солагии Истиқлолияти давлатии Ҷумҳурии Тоҷикистон бо майдони маҷмаи меъмории рамзи «Истиқлолият ва Озодӣ» зери таваҷҷуҳи хоссаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад.

Аз ин лиҳоз,  дар маҷлиси васеи Ҳукумати Ҷумҳурии Тоҷикистон 20 январи соли равон Президенти мамлакат муҳтарам Эмомалӣ Раҳмон ба Раиси шаҳри Душанбе Рустами Эмомалӣ ва дигар масъулин бобати дар муҳлати муқарраргардида ва бо сифати аъло ба анҷом расонидани корҳои сохтмонии Боғи «Истиқлолият» бо майдони маҷмааи меъмории рамзи «Истиқлолият ва Озодӣ» дастуру супоришҳои мушаххас доданд.

Масоҳати умумии Боғи «Истиқлолият» бо майдони маҷмааи меъмории рамзи «Истиқлолият ва Озодӣ» дар пойтахт 30 гектарро ташкил дода, он дар ҳудуди хиёбони Рӯдакӣ, кӯчаҳои Саид Носир, Ҳабиб Аҳрорӣ ва Ойгули пойтахт (паси «Кохи Ваҳдат» меҳмонхонаи «Авесто» ва Донишгоҳи омӯзгорӣ) воқеъ мебошад.

Раиси шаҳри Душанбе Рустами Эмомалӣ зимни шиносоӣ бо ҷараёни корҳои бунёдӣ дар иншооти мазкур ба сифатнокӣ ва муҳлати иҷрои корҳо, масолеҳи сохтмонӣ ва вусъат бахшидани дигар тадбирҳои вобаста ба бунёди он, аз ҷумла иншооти бартарафшавандаи атрофи маҷмаа таваҷҷуҳ зоҳир намуда, масъулинро муваззаф намуд, ки иҷрои корҳои сохтмониро дар вақти муқарраргардида таъмин намоянд.

Дар маҷмааи «Истиқлолият ва Озодӣ» майдони баргузории чорабиниҳои сиёсӣ, ки масоҳаташ 2,7 гектарро ташкил медиҳад, бунёд мешавад.

Майдони мазкур дар назди муҷассама ҷойгир шуда, барои роҳпаймоиву намоишҳои театришуда пешбинӣ шудааст.

Ин иншооти муҳташам аз минбар, дарвозаи марказӣ ва дарвозаҳои шимолию ҷанубӣ, фаввораҳо, шаршара, деворнигора, айвончаҳо, майдони баргузории роҳпаймоиҳо, гулгашт, ҳавзҳои декоративӣ бо наҳрҳо, таваққуфгоҳҳо ва ғайра иборат мебошад.

Баландии муҷассама 121 метр буда, қисми поёнии он 30 метр ва қисми болоии он 91 метрро ташкил медиҳад, ки он рамзи 30-солагии Истиқлолият ва дар соли 1991 ба даст овардани истиқлолиятро ифода менамояд.

Дар ҳудуди боғ зирк, сиёҳгилаи японӣ, ирғай, шамшоди ҳамешсабз, буттаҳои тобистонсабз, барфбуттамеваи сафед, ёсумани боғӣ, изғичи печон, бушол ва дигар намудани гулу бутта ва дарахтони нодир шинонида мешаванд.

Боғи «Истиқлолият» бо майдони маҷмааи меъмории рамзи «Истиқлолият ва Озодӣ» дар шаҳри Душанбе тибқи нақша соли 2021 мавриди истифода қарор дода мешавад.

Дар идомаи раванди созандагиҳо дар шаҳри Душанбе бунёди Боғи «Истиқлолият» бо майдони маҷмааи меъмории рамзи «Истиқлолият ва Озодӣ» аз пешрафту шукуфоӣ ва рушду нумуи мамлакат шаҳодат дода, дар он барои сокинону меҳмонони пойтахт тамоми шароит барои истироҳату фароғат фароҳам оварда мешавад.

 

Январь 29, 2020 17:13

Хабарҳои дигари ин бахш

Бахшида ба Рӯзи варзишгарони Тоҷикистон дар Душанбе Марафони велосипедронӣ баргузор мегардад
Дар шаҳри Душанбе 34-солагии Истиқлолияти давлатӣ ботантана ҷашн гирифта мешавад
Соли 2025 ба шаҳри Душанбе беш аз 450 ҳазор сайёҳ ворид гардид
Ба шаҳри Душанбе зиёда аз 11 ҳазор электромобил ворид карда шудааст
Соли 2025 дар шаҳри Душанбе 16 муассисаи таълимӣ ба истифода дода мешавад
НИШАСТИ МАТБУОТӢ. Дар ҳудуди шаҳри Душанбе сохтмони 7 эстакадаи нав оғоз меёбад
НИШАСТИ МАТБУОТӢ. Дар ноҳияи Сино сохтмон ва навсозии 279 иншоот ба нақша гирифта шудааст
НИШАСТИ МАТБУОТӢ. Корхонаҳои саноатии ноҳияи Фирдавсӣ ба маблағи зиёда аз 882 миллион сомонӣ маҳсулот истеҳсол намуданд
НИШАСТИ МАТБУОТӢ. Варзишгарони ноҳияи Исмоили Сомонии пойтахт дар мусобиқаҳо соҳиби 1620 медал шуданд
Барои иштирокчиёни Экспедитсияи байналмилалии «Саёҳат ба қалби Авруосиё-2025» дар Душанбе хатсайри сайёҳӣ ташкил гардид
Ҳаракати ҳама гуна воситаҳои нақлиёт дар баъзе кӯчаҳои марказии пойтахт муваққатан қатъ мегардад
Душанбе — пойтахти Тоҷикистон ба яке аз шаҳрҳои пешрафтаи сайёҳии дунё табдил ёфтааст