Си Ҷинпин талаб кард, ки муқовимат бар зидди эпидемияи коронавирус пурзӯр гардад

ДУШАНБЕ, 28.01.2020 /АМИТ «Ховар»/. Раиси Ҷумҳурии Мардумии Чин Си Ҷинпин аз ташкилотҳои ҳизбии тамоми сатҳҳо талаб кард, ки дар  мубориза бо паҳншавии эпидемияи намуди  коронавирус   тадбирҳои қатъӣ андешанд. Дар ин бора АМИТ «Ховар» бо истинод  ба телевизиони марказии Чин хабар медиҳад.

«Си Ҷинпин аз ташкилотҳои  ҳизбии ҳама сатҳҳо ва оммаи васеи кадрҳо талаб намудааст, ки  дар якҷоягӣ қарорҳои Кумитаи марказии ҲКЧ-ро бетаъхир иҷро намуда,  бо такя ба  оммаи васеъ  бар зидди  эпидемия мубориза  бурда, онро мағлуб созанд», —  хабар додааст шабакаи телевизионӣ. 

Қаблан рӯзи душанбе  бо супориши  Раиси Ҷумҳурии Мардумии Чин Си Ҷинпин  Сарвазири Шӯрои давлатӣ Ли Кэтсян ба Вухан, ки маркази эпидемия мебошад, ташриф овард. Вай корҳои  мубориза бо эпидемияро  назорат бурда, ҳамзамон  бо табибон ва беморон мулоқот  кард.

31 декабри соли 2019 мақомоти Чин ба  Ташкилоти  Умумиҷаҳонии Тандурустӣ дар бораи хурӯҷи бемории пневмонияи номаълум дар шаҳри Вухан, воқеъ дар қисми марказии  мамлакат  хабар доданд.   Мутахассисон  ангезандаи бемориро муайян карданд — ин  коронавируси 2019-nCoV аст.

Берун  аз қаламрави Чин   хурӯҷи ин вирус  дар Гонконг, Макао, Тайван, Таиланд, Япония, Кореяи Ҷанубӣ, ИМА, Канада, Ветнам, Сингапур, Непал, Франсия, Австралия ва Малайзия ба қайд гирифта шудааст.