Черногория – ягона кишваре, ки дар Аврупо аз коронавирус эмин мондааст
![](https://khovar.tj/wp-content/uploads/2020/03/CHernogoriya.jpg)
ДУШАНБЕ, 13.03.2020 /АМИТ «Ховар»/. Черногория дар Аврупо ягона кишварест, ки дар он то кунун ягон ҳолати сироятёбӣ аз коронавируси COVID-19 ба қайд гирифта нашудааст. Тавре АМИТ «Ховар» бо истинод ба INTERFAX.RU иттилоъ медиҳад, дар ин бора дар суҳбати телевизионӣ эпидемиологи Пажуҳишгоҳи тандурустии ин кишвар Игор Галич изҳорот дод.
Ба қавли ӯ, аз оғози эпидемия дар кишвар зиёда аз 2000 нафар ба ташхис фаро гирифта шудаанд. Айни ҳол 392 нафар таҳти назорати табибон қарор доранд.
«Ташхиси коронавирус ҳамагӣ ду-се соат тӯл мекашад, бинобар ин, натиҷаҳо ба зудӣ муайян мешаванд»,-илова намуд Галич.
Ӯ аз ҳамватанони хеш даъват намуд, ки гапҳои воҳимаангезона ва бардурӯғ паҳн насозанд.
Мувофиқи маълумоти охирин, дар олам 126 631 ҳолати сироятёбӣ аз коронавируси COVID-19 тасдиқ гашта, 4638 нафар вафот кардаанд. Шоми 11 март Созмони Умумиҷаҳонии Тандурустӣ вазъ бо коронавирусро пандемия эълон намуд.